Gecə yuxusu təsadüfən “gözəllik istirahəti” adlandırılmır: əgər bir neçə vacib qaydaya əməl etsəniz, səhər dəri həqiqətən daha parlaq və dincəlmiş görünə bilər. Yaş artdıqca axşam qulluğu daha böyük əhəmiyyət qazanır, çünki dəri təbii şəkildə solur və sıxlığını itirir. Sertifikatlı dermatoloq Bo DiÇikko yetkin dərinin səhərə qədər daha təravətli görünməsinə kömək edən 7 gecə vərdişini açıqlayıb.
HİT.az xəbər verir ki, bu barədə "Parade" jurnalı yazır.
Həkim öz təcrübəsini bölüşüb və axşam vərdişlərinin yetkin dərinin necə daha parlaq görünməsinə kömək etdiyini izah edib. O, 50+ qadınlar üçün xüsusilə faydalı ola biləcək yeddi addımı qeyd edib.
1. Yumşaq təmizləyici vasitə seçin: DiÇikko zərif formulların istifadəsini tövsiyə edib. O, nəmləndirici və yumşaq təmizləyici məhsulların axşam yuyunması üçün çox uyğun olduğunu bildirib.
2. Kimyəvi pilinqlərə üstünlük verin: Sərt fiziki skrablar əvəzinə AHA və ya BHA turşuları olan məhsullar — yüngül serumlar, pilinqlər və ya təmizləyicilər — istifadə etməyi məsləhət görüb.
3. Nəmləndirməni unutmayın: Mütəxəssis vurğulayıb ki, nəmləndirmə səhər dərinin vəziyyətinə təsir edən əsas mərhələlərdən biridir. O qeyd edib ki, qidalandırıcı, sıx nəmləndirici krem dərinin daha hamar və dolğun görünməsi üçün kömək edir.
4. Retinoidlərdən müntəzəm istifadə edin: DiÇikko retinol və ya retinoid tərkibli, dəri tipinə uyğun məhsul seçməyi məsləhət görüb. O izah edib ki, bu vasitələr hüceyrə yenilənməsini dəstəkləyir, tonu yaxşılaşdırır və piqmentasiyanı azaldır. Həkim vurğulayıb ki, əsas olan — müntəzəmlikdir; gündəlik və ya həftədə bir neçə dəfə istifadə olunması fərq etmir.
5. Səhər üçün günəşdən qoruyucu krem hazırlayın: Həkim SPF-in gəncliyi qoruyan ən güclü amillərdən biri olduğunu xatırladıb. Səhər unutmayasınız deyə günəşdən qoruyucunu əvvəlcədən hazırlamağın faydalı olduğunu deyib.
6. C vitamini əlavə edin: Mütəxəssis bildirib ki, antioksidant serumlar, xüsusən C vitamini olanlar, dəriyə əlavə qoruma təmin edir, günəş təsirindən yaranan zərərləri azaldır və dərinin daha parlaq və bərabər görünməsinə kömək edir.
7. Dəri baryerini qoruyun: DiÇikko dərinin reaksiyasını diqqətlə izləməyi tövsiyə edib. Əgər qıcıqlanma yaranarsa, retinoidlərdən və turşulardan müvəqqəti imtina etməyi, dərinin bərpa olunmasına imkan verməyi, daha sonra isə aktiv vasitələrə tədricən qayıtmağı məsləhət görüb. O bildirib ki, dəriyə həddindən artıq qıcıqlanma vermək bütün səyləri puça çıxarır — məqsəd iltihabı azaltmaqdır, artırmaq yox.
Əgər dəri gecə məhsullarına yaxşı reaksiya verirsə, dermatoloq gündəlik parlaqlığı qorumağa imkan verəcək uzunmüddətli baxım planı qurmağı tövsiyə edir. Bunun üçün isə yuxarıda göstərilən addımlardan başlamaq kifayətdir.
Samir
