BAKI, 4 dekabr. TELEQRAF
Keniyan parlamenti Britaniya Ordusunun Nanyuki yaxınlığında yerləşən təlim bazasında xidmət edən hərbçilərlə bağlı ciddi ittihamlar irəli sürüb.
Teleqraf xəbər verir ki, hesabatda insan hüquqlarının pozulması, ekoloji fəsadlar və seksual zorakılıq Britaniya əsgərlərinin adı ilə əlaqələndirilir.
“The Guardian" yazır ki, araşdırma Müdafiə, Kəşfiyyat və Xarici Əlaqələr Komitəsi tərəfindən aparılıb. Komitə Laikipia və Samburu bölgələrində ictimai dinləmələr keçirib, zərərçəkmişlərdən, yerli icmalardan və qurumlardan ifadələr toplayıb.
Komitə Britaniya hərbçiləri tərəfindən “zorlanma, hücum və atılmış uşaqlar”la bağlı çoxsaylı ifadələr topladığını bildirib. Zərərçəkmişlər işlərin yerli polis tərəfindən yarımçıq araşdırıldığını və ədalətə çıxışlarının əlindən alındığını deyiblər.
Batuk-un (Keniyada Britaniya Ordusunun Təlim Birliyi) 2003–2004-cü illərdə apardığı daxili araşdırmanın “əsas sübutları götürüb çoxsaylı şikayətləri əsassız” elan etdiyi, nəticələri isə dərc etmədiyi qeyd olunub.
Hesabat britaniyalı əsgərlərlə içkili olduğu axşamdan sonra meyiti septik çəndə tapılan 20 yaşlı Vanjirunun öldürülməsi işində Batuk-un müdaxilə ehtimalından dərin narahatlıq ifadə edib. Britaniyalı keçmiş hərbçi hazırda ekstradisiya prosesi ilə üzləşir.
Hesabat hərbi təlimlərin Laikipia və Samburu təbiətinə ciddi zərər vurduğunu, partlayışlar, hərbi hərəkətlər və qəsdən heyvanları qorxutmaqla bağlı şikayətlərin mövcud olduğunu vurğulayıb.
2021-ci ildə Batuk-un yaratdığı yanğın 10 min akrdan çox ərazini məhv edib.
Təlim zamanı bir şəxsin britaniyalı hərbçi tərəfindən güllələnərək öldürüldüyü də iddialar arasındadır.
Britaniya Müdafiə Nazirliyi hesabatın dərc edilməsini təsdiqləyərək bildirib ki, “yeni ittihamlarla bağlı yetərli sübut təqdim edildikdə onları tam şəkildə araşdırmağa hazırdır”.
