Şimali Hindistanın Qoa əyalətindəki Baqa çimərliyindəki Arpora qəsəbəsində məşhur “Birch by Romeo Lane” gecə klubunda baş verən yanğında ən azı 25 nəfər ölüb. Qurbanlar arasında dörd turist var. Daha 50 nəfər yaralanıb.
Oxuməni.az-ın “rfi.fr”-ə istinadən verdiyi məlumata görə, yanğın haqda məlumatı yerli hakimiyyət orqanları bazar günü açıqlayıb.
“Times of India” qəzetinin məlumatına görə, ölənlərin əksəriyyəti klub işçiləri olub. Polis şənbə günü yerli vaxtla gecə yarısı klubun mətbəxində qaz balonunun partladığını və yanğına səbəb olduğunu bildirib. Bazar günü səhər rəsmilər ölənlərin sayının 25-ə çatdığını açıqlayıblar.
Yerli hakimiyyət orqanları bildirib ki, üç nəfər yanıqlardan ölüb, qalanları isə boğulub. Cəsədlərin əksəriyyəti mətbəxin yaxınlığında tapılıb və bu da polisin qurbanların əksəriyyətinin işçi olduğuna inanmasına səbəb olub. Ölənlər arasında dörd turistin olduğu güman edilir, lakin onların milliyyətləri məlum deyil. Xəstəxanada olan altı nəfərin vəziyyəti stabildir.
Hakimiyyət orqanları hadisə ilə bağlı araşdırmaya başlayıb. Hindistanın Baş naziri Narendra Modi sosial mediada hadisədən dərin kədərləndiyini yazıb. Ərəb dənizində keçmiş Portuqaliya koloniyası olan Qoa hər il milyonlarla turisti qəbul edir. Hindistan hökumətinin məlumatına görə, ilin birinci yarısında bölgəyə təxminən 5,5 milyon turist gəlib ki, onlardan 270 mini xaricdən olub.
Almaz Həsənli
