Bakı, 8 dekabr, AZƏRTAC
Bu gün biz Cənubi Qafqaz, Mərkəzi Asiya və Asiya–Avropa ticarət kəsişməsində yeni iqtisadi mərhələnin formalaşdığı bir dövrdə yaşayırıq. Azərbaycanın Orta Dəhlizdə öz rolunu gücləndirməsi, Transxəzər ticarət-kommunikasiya xəttinin modernizasiyası və qlobal logistik inteqrasiyanın genişləndirilməsi istiqamətində atdığı addımlar region iqtisadiyyatının gələcəyini yenidən müəyyənləşdirir.
Bu sözləri AZƏRTAC-a açıqlamasında Pakistanın “Sourcing Pak Private Limited” şirkətinin idarəedici direktoru Rai Məhəmməd Usman deyib.
O bildirib ki, Azərbaycanın Asiyadan Avropaya uzanan daşımalar üzrə qlobal tranzit qovşağı statusunun möhkəmlənməsi təkcə nəqliyyat marşrutlarının genişlənməsi deyil, həm də yeni iqtisadi koordinasiya mexanizmlərinin qurulmasını tələb edir. Bu mənada Pakistanın “Sourcing Pak” şirkətinin beynəlxalq logistika, təchizat zənciri idarəçiliyi və hökumətlərarası layihələrin təminatı üzrə təcrübəsi Azərbaycan üçün strateji əlavə dəyər yarada bilər. Transxəzər marşrutları boyunca təchizat zəncirinin optimallaşdırılması, gömrük prosedurlarının harmonizasiyası və irihəcmli materialların standartlaşdırılmış satınalma modelinə keçirilməsi regionun bərpa və infrastruktur layihələrinin xərclərini əhəmiyyətli dərəcədə azalda, vaxt amilini isə sürətləndirə bilər.
“Bu məqsədlə təklif etdiyimiz Mərkəzi Asiya–Pakistan–Azərbaycan Ticarətin Asanlaşdırılması Platforması logistika protokollarının vahid platformada idarə olunmasına, rekonstruksiya materiallarının təminatına və transxəzər korridoru boyunca əməliyyat sabitliyinin gücləndirilməsinə xidmət edəcək. Uzunmüddətli perspektivdə bu təşəbbüs Azərbaycanı daha güclü, daha etibarlı və yüksək dərəcədə rəqabətqabiliyyətli logistika mərkəzinə çevirərək, regionda ticarət axınının proqnozlaşdırılması və investisiya təhlükəsizliyinin artırılmasına mühüm töhfə verəcək. Pakistan, Azərbaycan və Mərkəzi Asiya dövlətləri arasında sinerji formalaşdırmaqla, biz yeni iqtisadi mərhələnin əsasını qoya bilərik. Təqdim olunan bu çərçivə sadəcə konseptual vizyon deyil, real icra potensialına malik olan və tərəfdaşlıqla miqyaslana biləcək konkret layihə modelidir. Biz azərbaycanlı tərəfdaşlarımızla bu yol xəritəsini detallı şəkildə müzakirə etməyə və birgə inkişaf addımlarına başlamağa tam hazırıq”, - deyə Rai Məhəmməd Usman əlavə edib.
