“Avropa Ukraynaya çətin seçimlər etməkdə kömək etməlidir”.
Missiya.Az xəbər verir ki, bunu Türkiyənin xarici işlər naziri Hakan Fidan deyib.
"Avropa Ukraynaya bəzi çətin seçimlər etməyə kömək etməlidir. Böyük itkilərin qarşısını almaq üçün, yəni daha böyük xeyir üçün burada fəlakətin qarşısını almaq, pisliyi aradan qaldırmaq lazımdır... Buna görə də seçim edilməlidir. Bilirəm ki, bu, onlar üçün çətindir. Torpaq məsələsi xüsusilə mürəkkəbdir. Allah heç kimə belə bir şey yaşatmasın", - deyə siyasətçi vurğulayıb.
Fidan bildirib ki, təhlükəsizlik zəmanətləri ilə bağlı tələblər də var ki, bu da çətindir.
O qeyd edib ki, Türkiyə iki tərəf arasında danışıqları asanlaşdırmağa davam edir.
Fidan əlavə edib ki, İstanbul danışıqlara yenidən ev sahibliyi etməyə hazırdır: bu yay orada üç raund danışıqlar keçirilib.
Siyasətçi qeyd edib ki, əsir mübadiləsi və digər humanitar məsələlər üzrə danışıqlarda əldə edilən irəliləyiş bugünkü danışıqların əsasını təşkil edib.
O, həmçinin müharibənin artıq Qara dənizə yayıldığını və Avropanın digər bölgələrinə də yayıla biləcəyini xəbərdar edib, ona görə də tərəfləri dərhal hərbi əməliyyatları dayandırmağa çağırıb.
“Bu, həm də bugünkü danışıqların təməlini qoyub. Biz bu müsbət rolu oynamağa hazırıq. Baxın, Qara dəniz artıq müharibə zonasının uzantısına çevrilib. Müharibə Qara dənizə də yayılıb. Onlar indi Qara dənizdə ticarət gəmilərinə və tankerlərə hücum edirlər. Buna görə də, müharibə davam edərsə, o, başqa yerlərə, Avropanın digər hissələrinə də yayılacaq. Allah eləməsin, bu, burada və indi bitməlidir”, - deyə Fidan yekunlaşdırıb.
Daşqın HəsənovMissiya.Az
