Qeyri-hökumət təşkilatları hakimiyyətin mühüm qollarından biri kimi ölkəmizin ictimai və siyasi həyatında fəal rol oynayırlar. Bu fakt məsələnin nə qədər əhəmiyyətli olduğunu açıq şəkildə göstərir. 2025-ci ildə Azərbaycan qeyri-hökumət təşkilatları ümumilikdə olduqca fəal olublar. Onlar müxtəlif tədbirlər, aksiyalar, dinləmələr, görüşlər, paylaşımlar və nəşrlər vasitəsilə bu prosesə öz töhfələrini veriblər.
Bunu Milli Məclisin deputatı Ceyhun Məmmədov QHT.az -a açıqlamasında bildirib. Onun sözlərinə görə, bir neçə gün əvvəl Azərbaycan Uşaqları Birliyinin təşkilatçılığı ilə keçirilən bir tədbirdə iştirak edib, bu təşəbbüs xüsusilə önəmli idi. Tədbirdə uşaqların virtual mühitdə qorunması, uşaq hüquqlarının müdafiəsi, eləcə də qadın hüquqları və sülh istiqamətində irəli sürülən təşəbbüslər müzakirə olunurdu:
"Mən bu kimi təşəbbüsləri çox yüksək qiymətləndirirəm. 2025-ci ildə qeyri-hökumət təşkilatlarının oynadığı rola gəlincə, ilk növbədə onların dövlət qurumları ilə birgə fəaliyyətini xüsusi qeyd etməliyik. QHT-lər dövlət qurumları ilə yanaşı, birgə addımlar ataraq fəal şəkildə fəaliyyət göstəriblər. Milli Məclisdə dəfələrlə ekoloji, təhsil, vətəndaş–dövlət münasibətləri və digər sahələr üzrə dinləmələr keçirilib. Bu sahələrdə qeyri-hökumət təşkilatlarının ciddi fəallığını və səylərini açıq şəkildə müşahidə etdik. Hesab edirəm ki, bu cür fəaliyyətlər daha da artırılmalı, genişləndirilməli və gücləndirilməlidir. Bu, öz növbəsində cəmiyyətə və dövlətçiliyin inkişafına mühüm müsbət töhfələr verəcək".
Sonda deputat qeyd edib ki, bu gün qeyri-hökumət təşkilatlarının ölkənin ictimai həyatında fəal rolu aydın şəkildə görünür və cəmiyyət də bu təşəbbüslərə öz münasibətini və dəstəyini nümayiş etdirir.
