Bizimyol saytından alınan məlumatlara görə, ain.az xəbər verir.
Rusiya nüvə döyüş başlığı daşımaq imkanına malik yeni hipersəsli ballistik “Oreşnik” raketlərini Belarusun şərqində yerləşən keçmiş aviabazada yerləşdirib.
Bizimyol.info xəbər verir ki, bu barədə "Planet Labs" kommersiya şirkətinə məxsus peyk görüntülərini araşdıran iki amerikalı tədqiqatçı məlumat verib.
Onların qiymətləndirməsinə görə, mobil buraxılış qurğuları Minskdən təxminən 307 kilometr şərqdə, Kriçev şəhəri yaxınlığındakı bazada yerləşdirilib. Tədqiqatçılar nəticələrindən 90 faiz əmin olduqlarını bildiriblər. Vəziyyətlə tanış mənbənin sözlərinə görə, bu qiymətləndirmə ümumilikdə ABŞ kəşfiyyatının nəticələri ilə üst-üstə düşür.
Bundan əvvəl Rusiya prezidenti Vladimir Putin Belarus ərazisində uçuş məsafəsi 5 500 kilometrə qədər olan orta mənzilli “Oreşnik” raketlərini yerləşdirmək niyyətini açıqlamışdı, lakin konkret dislokasiya yeri göstərilməmişdi. Ötən həftə isə Aleksandr Lukaşenko ilk raketlərin yerləşdirildiyini bildirsə də, onların harada olduğu barədə danışmamışdı.
Tədqiqatçılar Ceffri Lyuis və Deker Evelet qeyd ediblər ki, peyk görüntülərində avqust ayında başlayan tələsik tikinti işlərinin əlamətləri müşahidə olunub. Fotolarda strateji raket bazalarına xas obyektlər görünür.
Eveletin sözlərinə görə, şəkillərdən birində hərbi təyinatlı, hasarlanmış dəmir yolu yükləmə-boşaltma məntəqəsi əks olunub və raketlərin, eləcə də buraxılış qurğularının bu məntəqə vasitəsilə gətirilmiş ola biləcəyi ehtimal edilir. Lyuis isə uçuş-enmə zolağının sonunda torpaqla örtülmüş beton meydançanın mövcudluğunu vurğulayıb və bunun “maskalanmış buraxılış nöqtəsinə uyğun gəldiyini” bildirib.
Mütəxəssislərin qiymətləndirməsinə görə, Kriçev yaxınlığındakı bu meydança maksimum üç buraxılış qurğusu üçün nəzərdə tutulub. Lukaşenko daha əvvəl Belarusda bu cür komplekslərdən onadək yerləşdirilə biləcəyini demişdi; qalanlarının isə ehtimal ki, digər ərazilərdə olduğu düşünülür.
"Chatham House" analitiki Con Formanın fikrincə, raketlərin Belarusda yerləşdirilməsi Avropa üzrə zərbə zonasını genişləndirməyə yönəlib və ABŞ-ın Almaniyada yeni orta mənzilli raketlər yerləşdirmək planlarına cavab xarakteri daşıyır.
Qadir, Bizimyol.info
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
