Afrika Millətlər Kubokunun 1/8 final mərhələsi çərçivəsində Cənubi Afrika Respublikası (CAR) və Kamerun milli komandaları arasında keçirilən qarşılaşma başa çatıb.
90deqiqe.Az-ın məlumatına görə, matç Mərakeşin paytaxtı Rabatda yerləşən “Əl-Mədinə” stadionunda baş tutub. Görüşün baş hakimi Keniyadan olan Piter Vaveru Kamaku olub. Qarşılaşma Kamerun yığmasının 2:1 hesablı qələbəsi ilə yekunlaşıb.
Oyunda hesabı 34-cü dəqiqədə Kamerun millisinin yarımmüdafiəçisi Junior Çamadyu açıb. 47-ci dəqiqədə hücumçu Kristian Kofane fərqi iki topa çatdırıb. Matçın sonlarına yaxın, 88-ci dəqiqədə CAR millisinin hücumçusu Evidens Makqopa bir qolla fərqlənsə də, bu, komandası üçün məğlubiyyətdən xilas olmaq üçün yetərli olmayıb.
Bu nəticə ilə Kamerun yığması 1/4 finala yüksəlib. Kamerun növbəti mərhələdə turnirin ev sahibi olan Mərakeş millisi ilə qarşılaşacaq.
Qeyd edək ki, Afrika Millətlər Kuboku–2025 Mərakeşdə keçirilir. Turnirdə 24 milli komanda iştirak edir və onlar altı qrupa bölünüb. Yarış 18 yanvar tarixinədək davam edəcək. Turnirin son qalibi Kot-d’İvuar yığmasıdır. Sözügedən komanda 2023-cü il finalında Nigeriyanı 2:1 hesabı ilə məğlub edərək çempion olub.
