Təyyarə havaya qalxdıqdan dərhal sonra çevrilərək yanıb, göyərtədə olanların hamısı həyatını itirib...
Poliqon xəbər verir ki, ABŞ-nin Men ştatında yerləşən Banqor hava limanından havaya qalxan şəxsi biznes-jetin qəzaya uğraması nəticəsində altı nəfər ölüb. CBS News telekanalı ştat polisinin məlumatına istinadla bildirir ki, hadisə yanvarın 25-i, bazar günü yerli vaxtla saat 19:45 radələrində baş verib.
İlkin məlumata əsasən, təyyarə uçuş-enmə zolağından ayrıldıqdan qısa müddət sonra idarəetməni itirib, çevrilib və yanğın başlayıb. Göyərtədə olan bütün şəxslər hadisə yerində həlak olub. Daha əvvəl ABŞ Federal Mülki Aviasiya İdarəsinin (FAA) hesabatında yeddi nəfərin öldüyü və bir nəfərin sağ qaldığı bildirilsə də, sonradan bu məlumatlar dəqiqləşdirilib.
Qəzanın səbəblərinin araşdırılması FAA və ABŞ Milli Nəqliyyat Təhlükəsizliyi Şurası (NTSB) tərəfindən aparılır. Telekanalın məlumatına görə, qəzaya uğrayan hava gəmisi Texas ştatının Hyuston şəhərində yerləşən hüquq firmasının adına qeydiyyatdan keçib.
Bildirilir ki, qəza ABŞ-nin şimal-şərq regionunda güclü qar fırtınasının hökm sürdüyü bir vaxta təsadüf edib. Mənfi hava şəraiti bölgədə aviasiya uçuşları üçün ciddi risklər yaradıb və bir sıra reyslərin ləğvinə səbəb olub.
Poliqon.info
