20 bəndlik sənəd ikitərəfli olacaq və ABŞ Ukrayna ilə ayrıca, Rusiya ilə ayrıca imza atacaq...
Poliqon xəbər verir ki, Ukraynanın xarici işlər naziri Andriy Sibiga bildirib ki, Rusiya-Ukrayna münaqişəsinin nizamlanması üzrə 20 bəndlik sülh sazişi ABŞ ilə Ukrayna arasında, ABŞ isə ayrıca sənəd vasitəsilə Rusiyaya ilə imzalanacaq. O, bu sənədin hal-hazırda sülh prosesinin mərkəzində olduğunu və ikitərəfli xarakter daşıdığını vurğulayıb.
“Bu 20 bəndlik çərçivə sənədinə gəldikdə, bu hazırda ABŞ və Ukrayna tərəfindən imzalanacaq ikitərəfli sənəddir. Rusiya ilə isə sənədi ABŞ imzalamalıdır”, deyə Sibiga qeyd edib. Nazir əlavə edib ki, danışıqlar hələ davam edir və sənədlərin son forması dəyişə bilər.
Sülh planının bir bəndi Ukraynanın Avropa inteqrasiyasına aiddir. Sibiga bildirib ki, sənəd Avropa İttifaqı tərəfindən imzalanmasa belə, heç bir müddəa Avropa tərəfdaşlarının razılığı olmadan qəbul edilə bilməz. Eyni zamanda, Ukraynanın 2027-ci ildə Aİ-yə üzvlüyü ideyası hələ də müzakirə mövzusudur.
“Tarix asan məsələ deyil. Aİ öz prosedurlarına malikdir və biz konsensus yanaşmasının əsiriyik”, deyə Ukrayna XİN rəhbəri əlavə edib.
Nazir həmçinin vurğulayıb ki, Avropa tərəfdaşları sülh prosesində iştirak edir, xüsusilə Ukrayna üçün təhlükəsizlik zəmanətlərinin müzakirəsində. Sibiga bildirib ki, bu dəfə söhbət siyasi deklarasiyalardan yox, hüquqi baxımdan öhdəlik yaradan zəmanətlərdən gedir. “Vacibdir ki, zəmanətlərin ratifikasiyası, xüsusilə ABŞ Konqresində zəruridir”, deyə nazir qeyd edib.
Ötən həftə BƏƏ paytaxtında ABŞ, Ukrayna və Rusiya nümayəndələrinin iştirakı ilə üçtərəfli ilkin konsultasiyalar keçirilib. Ukrayna tərəfi danışıqları konstruktiv adlandırsa da, ərazi məsələlərində razılığa gəlmək mümkün olmayıb.
Poliqon.info
