Azertag portalından verilən məlumata görə, ain.az xəbər yayır.
Bakı, 29 yanvar, Anara Axundova, AZƏRTAC
Yeni ilin əvvəlində “Arts Council Azerbaijan”ın təşəbbüsü ilə bir neçə mədəniyyətlərarası bədii tədbir keçirilib. Bu təşkilatın rəhbəri, mədəniyyət xadimi Dadaş Məmmədov AZƏRTAC-ın müxbiri ilə söhbətində incəsənətin ölkələr arasında mədəni əlaqələrin qurulmasına necə kömək etdiyi barədə danışıb.
O qeyd edib: “İncəsənət universal və başadüşülən bir dildir. Sərgilər, festivallar və birgə layihələr vasitəsilə ölkələr bir-birini daha yaxşı tanıyır, dialoq qurur və mədəni əlaqələri gücləndirir. “Arts Council Azerbaijan” dörd qitədə - Avropa, Afrika, Şimali və Cənubi Amerikada mədəni layihələr həyata keçirib. Bu təcrübə göstərir ki, incəsənət insanları effektiv şəkildə birləşdirir və beynəlxalq əməkdaşlıq üçün mühüm alətə çevrilir”.
Rəssamlar üçün beynəlxalq, mədəniyyətlərarası layihələrdə iştirak etməyin faydalarından danışan müsahibimiz bildirib ki, bu, onlara peşəkarlıq səviyyəsini inkişaf etdirmək, yeni auditoriyaya çatmaq və beynəlxalq mühitdə işləmək imkanı verir.
“Bu, təcrübə mübadiləsi, yeni əlaqələr və daha çox tanınmaq deməkdir. Biz səfirliklər və diplomatik nümayəndəliklər ilə sıx əməkdaşlıq edirik. Məsələn, bu yaxınlarda keçirilən Çexiya sərgimiz diplomatik strukturlarla səmərəli əməkdaşlığın nəticəsi oldu və mədəni təşəbbüslərin inkişafı üçün bu cür tərəfdaşlıqların əhəmiyyətini nümayiş etdirdi. Rəssamlar öz əsərləri vasitəsilə başqa bir ölkənin mədəniyyətini araşdırdıqda, dərin fikir və məna mübadiləsi baş verir. Bu, bizə xarici mədəniyyəti daha yaxşı başa düşməyə və özümüzə yeni bir perspektiv qazanmağa kömək edir. Azərbaycanlı rəssamların Çexiya mövzusunda işlədiyi layihə qarşılıqlı hörmətin və davamlı mədəni dialoqun incəsənət vasitəsilə necə inkişaf etdirilə biləcəyini aydın şəkildə nümayiş etdirdi”, - deyə Dadaş Məmmədov vurğulayıb.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
