Rusiya xarici işlər naziri Sergey Lavrov Yaxın Şərqdə baş verən proseslərin Fələstin məsələsinin həlli istiqamətindəki səylərə mane olduğunu bildirib.
Sitat.info xarici mətbuata istinadən xəbər verir ki, o, Moskvada keçirilən Beynəlxalq Valday Müzakirə Klubunun 15-ci Yaxın Şərq Konfransında çıxışı zamanı qeyd edib ki, mövcud təşəbbüslərə baxmayaraq, regionun yaxın dövrdə sabitləşəcəyi real görünmür.
Lavrovun sözlərinə görə, Ərəb Baharından sonra Yaxın Şərqdə sakitliyə doğru heç bir müsbət meyl müşahidə edilmir və bölgədəki hadisələr əsasən Fələstin probleminin həllini ləngidir. O, 2002-ci il Ərəb Sülh Təşəbbüsünün İbrahim Sazişləri fonunda arxa plana keçdiyini xatırladıb.
Nazir Tramp administrasiyası dövründə irəli sürülən Qəzza ilə bağlı sülh planının zorakılığın azaldılmasına yönəldiyini bildirsə də, İsrail qoşunlarının çıxarılması, HƏMAS-ın tərksilahı və Qəzzada idarəetmə məsələlərində hələ də qeyri-müəyyənliklərin qaldığını vurğulayıb. O qeyd edib ki, ABŞ planın ikinci mərhələsinin başladığını elan etsə də, Fələstin dövlətinin yaradılması hələ də əsas və açıq qalan məsələdir.
Lavrov həmçinin İranla bağlı vəziyyətin diqqətlə izlənildiyini, Oman hökumətinin vasitəçilik səylərinin dəstəkləndiyini və problemin sülh yolu ilə həllinin vacib olduğunu bildirib.
Nazir Suriyada isə kürd məsələsi və milli-dini birliyin təmin olunmasının region üçün ciddi çağırış olaraq qaldığını qeyd edib.
///AZXEBER.COM
