BAKI, 12 fevral. TELEQRAF
Kanada polisi Britaniya Kolumbiyası əyalətinin Tumbler Ridc qəsəbəsində məktəbdə kütləvi qətl törədən şəxsin psixi sağlamlıq problemləri olan 18 yaşlı qadın olduğunu açıqlayıb.
Teleqraf xəbər verir ki, hadisə ölkə tarixində ən ağır silahlı hücumlardan biri kimi qiymətləndirilir. Polis ölənlərin sayını əvvəl bildirilən 10 nəfərdən doqquza endirib və şübhəlinin təkbaşına hərəkət etdiyini bildirib.
Məlumata görə, hücumu həyata keçirən şəxs Cessi Van Rutselaar adlanır. O, hadisədən sonra intihar edib. Kral Kanada Atlı Polisi Britaniya Kolumbiyası üzrə komandanı, komissar müavini Duayn Makdonald bildirib ki, hüquq-mühafizə orqanları son illər ərzində dəfələrlə həmin ailənin evinə psixi sağlamlıqla bağlı narahatlıqlara görə baş çəkiblər.
Makdonaldın sözlərinə görə, kişi cinsində doğulan və altı il əvvəl özünü qadın kimi tanıtmağa başlayan Van Rutselaar əvvəlcə ailə evində 39 yaşlı anasını və 11 yaşlı ögey qardaşını öldürüb. Daha sonra o, məktəbə gedərək 39 yaşlı qadın müəllimi, həmçinin üçü 12 yaşlı qız şagirdi və biri 12, digəri 13 yaşlı iki oğlan şagirdi güllələyib.
Polis nümayəndəsi mətbuat konfransında motiv barədə danışmağın hələ tez olduğunu, lakin şübhəlinin təkbaşına hərəkət etdiyinə inandıqlarını deyib.
Günün əvvəlində Kanadanın baş naziri Mark Karni baş verənləri “dəhşətli” adlandırıb və ölkənin bu faciəni birlikdə aşacağını bildirib. O, Avropaya planlaşdırılan səfərini təxirə saldığını və növbəti yeddi gün ərzində dövlət binalarında bayraqların yarıyadək endirilməsi barədə göstəriş verdiyini açıqlayıb.
“Biz bunu birlikdə keçəcəyik. Bir-birimizi dəstəkləmək, birlikdə yas tutmaq və birlikdə güclənmək vaxtıdır”, – deyə Karni jurnalistlərə bildirib.
Qeyd edək ki, Kanada bir çox ölkələrdən daha sərt silah qanunlarına malikdir, lakin lisenziya ilə odlu silah saxlamaq mümkündür. 2020-ci ilin aprelində Nova Skotiya əyalətində polis formasında olan 51 yaşlı şəxs 13 saatlıq hücum zamanı 22 nəfəri öldürmüşdü. Ölkənin ən ağır məktəb atışması isə 1989-cu ilin dekabrında Monreal şəhərindəki Politexnik məktəbində baş vermiş, silahlı şəxs 14 qadın tələbəni öldürmüş və daha 13 nəfəri yaralamışdı.
Yerli əyalət deputatı Lerri Noyfeld baş verənlərin icmanın yaşadığı dağıntının miqyasını ifadə edəcək söz tapmağın çətin olduğunu deyib və bu terrorun izlərini silmək üçün böyük səy və cəsarət lazım olacağını vurğulayıb.
