Əziz Ələkbərli,
Mmilli Məclisin deputatı,
Qərbi Azərbaycan İcması
İdarə Heyətinin sədri

13 fevral tarixində dünya siyasətinin mərkəzi hesab olunan Münxendə Azərbaycanın diplomatik qələbəsinin növbəti sədaları eşidildi. Prezident İlham Əliyevin müsahibəsindəki ən təsirli və qürurverici məqam onun bu mötəbər konfransa gəlişinin mahiyyətində gizlənmişdi. Dövlət başçısı öz statusunu aydın və qürurlu bir şəkildə ifadə edərək bildirdi: “Həmişə olduğu kimi, bizim mesajımız əməkdaşlığa və sülhə istiqamətlənib. İlk dəfədir ki, mən bu tədbirdə artıq sülhü əldə etmiş dövlət başçısı kimi iştirak edirəm.” Bu cümlə Azərbaycanın onilliklər boyu keçdiyi çətin və şərəfli yolun, tökülən qanların və qazanılan haqqın ən ali ifadəsi idi. Artıq gündəlikdə müharibənin ağrıları deyil, sülhün və tərəfdaşlığın yaratdığı geniş üfüqlər dayanırdı.

Lakin bu sülhün hüquqi müstəvidə tam bərqərar olması üçün qarşı tərəfin – Ermənistanın üzərinə düşən tarixi məsuliyyət hələ də qalmaqdadır. Prezident Ermənistan Konstitusiyasına diqqət çəkərək ərazi iddialarının aradan qaldırılmasının vacibliyini xüsusi qeyd etdi: “O dəyişikliklər edilən kimi, ertəsi gün biz sülh müqaviləsini imzalaya bilərik. Amma buna baxmayaraq, mən hesab edirəm ki, artıq Ermənistanla Azərbaycan arasında sülh əldə edilib.” Bu bəyanat qalib tərəfin sülhə olan sadiqliyinin, eyni zamanda milli maraqlardan bir addım belə geri çəkilməyəcəyinin həm bədii, həm də siyasi təzahürü idi.

Dünya nizamının sarsıldığı, köhnə sütunların yerlə-yeksan olduğu bir dönəmdə İlham Əliyev müasir siyasətin ən acı, lakin ən dürüst reallığını dilə gətirdi. Beynəlxalq hüququn artıq etibarlı bir qalxan olmadığını, BMT kimi nəhəng təsisatların iflic vəziyyətinə düşdüyünü vurğulayan Lider Azərbaycanın öz yolunu necə qətiyyətlə cızdığını nümayiş etdirdi. O, yeni bir dünya sisteminin formalaşma mərhələsində olduğunu qeyd edərək sivil münasibətlərin vacibliyinə toxundu: “Yeni dünya nizamı “kim güclüdür, o da haqlıdır” anlamına gəlməməlidir. Yeni dünya nizamı sivil dünyanın münasibətləri və beynəlxalq nizamın yeni mexanizmləri deməkdir.” Bu fikirlər Azərbaycanın təkcə öz sərhədləri daxilində deyil, planetar miqyasda ədalətin və sağlam düşüncənin tərəfdarı olduğunun bariz nümunəsidir. Davosda imzalanmış “Sülh Şurasının Nizamnaməsi” və Azərbaycanın bu qurumun təsisçi üzvü olması ölkəmizin yeni dünya arxitekturasında artıq aparıcı memarlardan birinə çevrildiyini bəşəriyyətə elan edir.

Azərbaycanın bugünkü qüdrəti yalnız hərbi və siyasi zəfərlərlə məhdudlaşmır, bu güc həm də polad iradəli dəhlizlərdən, rəqəmsal gələcəkdən və texnoloji intibahdan keçir. Prezidentin müsahibəsində təsvir etdiyi Azərbaycan – qitələri birləşdirən bir körpü, enerji və informasiya axınının mərkəzi qovşağıdır. Biz artıq yalnız neft və qazdan danışmırıq, gündəmimizdə elektrik kabelləri, fiber-optik xətlər və süni intellekt dayanır. Zəngəzur dəhlizinin gələcəyə açılan bir qapı olduğunu vurğulayan dövlət başçısı, ölkəmizin əvəzedilməzliyini bu sözlərlə xülasə etdi: “Bu gün Azərbaycan həm Şərqdə, həm də Qərbdə ehtiyac duyulan ölkədir. Azərbaycanın öz təhlükəsizliyini və suverenliyini öz gücü ilə təmin etməsi nəzərə alınmaqla, təbii ki, ölkəmizin beynəlxalq nüfuzu daha da artıb.”

Bu böyük vizyonun mərkəzində dayanan ən həssas və strateji məqamlardan biri də tarixi yaddaşın bərpası – Qərbi Azərbaycan mövzusudur. Prezident İlham Əliyevin Münxen platformasındakı qətiyyəti, illərdir həsrətlə gözlənilən bir haqqın – soydaşlarımızın öz dədə-baba torpaqlarına dinc şəkildə qayıtması idealının beynəlxalq müstəviyə daşınmasıdır. Bu, sadəcə bir ərazi məsələsi deyil, bu, tarixi ədalətin tam qələbəsi, illərlə didərgin düşmüş insanların mənəvi bütövlüyünün bərpasıdır. Dövlət başçısının vurğuladığı kimi, sülh və təhlükəsizlik yalnız keçmişin yaraları sarıldıqda və hər bir azərbaycanlının öz doğma ocağına qayıtmaq hüququ tanındıqda tam olacaqdır. Göyçənin, Zəngəzurun, İrəvanın ruhu bu gün Azərbaycanın diplomatik masadakı polad iradəsinə hopub. Biz artıq yalnız işğaldan azad edilmiş Qarabağla kifayətlənmirik, biz bütün tarixi torpaqlarımızda sülhün və mədəniyyətimizin yenidən çiçəklənməsinin strategiyasını cızırıq.

Bu dəfə Münxen divarları arasında səslənən hər bir kəlmə, Azərbaycanın təkcə regionda deyil, qlobal siyasi mənzərədə yeni bir günəş kimi doğduğunun, hər bir soydaşımızın hüququnun arxasında duran qüdrətli bir dövlətin varlığının təsdiqi idi. Kürsüdə dayanan Lider münaqişənin həllini xahiş edən deyil, həm Qarabağda, həm də tarixi yaddaşımızda sülhü və ədaləti öz gücü ilə yaratmış bir sərkərdə obrazında idi.

Bu, bir dövlətin öz taleyini öz əlləri ilə yazmasının, heç kəsdən asılı olmadan öz zirvəsinə doğru inamla irəliləməsinin hekayəsidir. Münxen səmalarında əks-səda doğuran bu mesajlar Azərbaycanın sarsılmaz dövlətçilik ənənəsinin və İlham Əliyev zəkasının parlaq təntənəsidir. Prezident İlham Əliyevin Münxen Təhlükəsizlik Konfransı çərçivəsində Azərbaycan telekanallarına verdiyi müsahibə, sadəcə bir dövlət başçısının diplomatik hesabatı deyil, zəfərlə yoğrulmuş yeni bir dövrün qətiyyətli sədasıdır. Bu çıxış, illər boyu haqqı tapdanan, lakin öz dəmir iradəsi ilə ədaləti bərpa edən bir xalqın Liderinin dünyaya ünvanlanmış strateji manifestidir. Münxen divarları arasında səslənən hər bir kəlmə, Azərbaycanın təkcə regionda deyil, qlobal siyasi mənzərədə yeni bir günəş kimi doğduğunun təsdiqi idi.

• Yol Xəritəsi
• Yeni Dövr
• Bəyanatlar
• Münxen