Britaniya polisi onun ifadə verdikdən sonra bölməni mühafizə altında tərk etdiyini açıqlayıb...
Böyük Britaniyanın keçmiş şahzadəsi, York hersoqu Endrü Mountbetten-Vindzor polis tərəfindən 12 saat davam edən dindirilmədən sonra sərbəst buraxılıb.
Poliqon xəbər verir ki, bu barədə USA Today qəzeti Böyük Britaniya polisinin açıqlamasına istinadla məlumat yayıb.
Məlumata görə, York hersoqu Endrü Mountbetten-Vindzor polis bölməsini mühafizə müşayiəti ilə avtomobildə tərk edib və jurnalistlərin suallarını cavablandırmaqdan imtina edib. Xəbərin yayımlandığı vaxta qədər kral ailəsi tərəfindən rəsmi açıqlama verilməyib.
Fevralın 19-da Daily Mail nəşri Böyük Britaniya kralı III Çarlzın qardaşı, York hersoqu Endrü Mountbetten-Vindzorun ABŞ maliyyəçisi Jeffrey Epstein ilə əlaqələri ətrafında yaranmış qalmaqal fonunda saxlanıldığını yazmışdı. Bildirilmişdi ki, keçmiş şahzadə ad günü ərəfəsində dövlət xidmətində qeyri-münasib davranış şübhəsi ilə tutulub.
Müşahidəçilər hesab edirlər ki, York hersoqu Endrü ilə bağlı proseslər Böyük Britaniya monarxiyasının nüfuzuna əlavə təzyiq yarada bilər. Hazırda istintaq tədbirlərinin davam etdiyi bildirilir və hüquq-mühafizə orqanları əlavə detalları açıqlamır.
Poliqon.info
