Sankt-Peterburqda təmizlik işçisi olaraq çalışan miqrant kişi binanın yeddinci mərtəbəsindən yıxılan altı yaşlı oğlanı xilas edib.
Hafta.az yazır ki, bu barədə “RİA Novosti” təcili yardım xidmətlərinə istinadən məlumat yayıb.
Agentliyin məlumatına görə, uşaq xadimənin sayəsində xilas edilib. Xadimə oğlanı tutaraq bədəni ilə zərbəni yumşalda bilib. Həkimlər uşağı xəsarətlərlə xəstəxanaya yerləşdiriblər.
Xilasedicinin iş üçün Özbəkistandan gəlmiş Xeyrulla adlı miqrant olduğu bilinib.
Şahidlərin sözlərinə görə, uşaq təmizlik işçisinin sürətli reaksiyası sayəsində xilas edilib. Oğlanın yıxıldığını görən kişi qollarını açıq vəziyyətdə saxlayıb və uşağı tuta bilib. Xilasedicinin özü xəsarət alıb. Mash Telegram kanalının məlumatına görə, onun qabırğaları sınıb və qolu zədələnib.
Xilasedicinin vəziyyəti ilə bağlı ətraflı məlumat verilməyib.
Daha sonra müəyyən edilib ki, hadisə zamanı uşağın anası evdə olub. Bundan əlavə, mənzilin pəncərələrinə xüsusi pəncərə kilidləri quraşdırılmayıb. Üzbəüz binada yaşayan qonşu açıq pəncərədə dayanan uşağı görüb və kömək üçün qışqırıb. Bu zaman sözügedən qəhrəman həyətə qaçıb və pəncərələrin altında dayanaraq yıxılan uşağı tutub.
