“El Menço” ləqəbli cinayətkarın saxlanılması və sonradan öldürülməsi onun sevgililərindən birinə yaxın şəxsdən əldə edilən məlumat sayəsində mümkün olub...
Poliqon xəbər verir ki, Meksika hakimiyyətinin məlumatına görə, ölkənin ən çox axtarılan narkokartel rəhbərlərindən biri olan Nemesio Oseqera Servantes, “El Menço” ləqəbli cinayətkarın saxlanılması və sonradan öldürülməsi onun sevgililərindən birinə yaxın şəxsdən əldə edilən məlumat sayəsində mümkün olub. Əməliyyatdan sonra kartel tərəfdarlarının cavab hücumları nəticəsində Milli Qvardiyanın 25 hərbçisi öldürülüb.
“El Menço” Qərbi Meksikada fəaliyyət göstərən və ölkənin ən güclü cinayət şəbəkələrindən biri hesab olunan Jalisco New Generation Cartel (CJNG) kartelinin qurucusu və lideri idi. O, uzun illərdir Meksikanın ən təhlükəli cinayətkarlarından biri sayılırdı. ABŞ Ədliyyə Nazirliyi onun tutulmasına kömək edəcək məlumat üçün 15 milyon dollar mükafat vəd etmişdi.
Meksika Müdafiə Nazirliyinin açıqlamasına əsasən, Oseqera qərb bölgəsində yerləşən Tapalpa şəhəri yaxınlığında meşəlik ərazidə keçirilən xüsusi əməliyyat zamanı yaralanıb. O, helikopterlə paytaxt Mexiko şəhərinə aparılarkən aldığı xəsarətlərdən həyatını itirib.
Müdafiə naziri Rikardo Trevilya bildirib ki, Oseqeranın sevgililərindən birinə yaxın etibarlı mənbədən alınan məlumat təhlükəsizlik qüvvələrinə kartel rəhbərinin yerləşdiyi malikanəyə qarşı sürətli əməliyyat planlaşdırmağa imkan verib. Reyd zamanı silahlı kartel üzvləri təhlükəsizlik qüvvələrinə atəş açıb və qarşıdurma meşəlik ərazidə yerləşən kottec kompleksinə qədər davam edib. Atışma nəticəsində Oseqera və iki mühafizəçisi yaralanıb, lakin onların heç biri sağ qalmayıb.
Kartel liderinin ölümü ölkə üzrə genişmiqyaslı zorakılıqlara səbəb olub. CJNG tərəfdarları bir sıra ştatlarda yolları bağlayıb, nəqliyyat vasitələrini yandırıb və təhlükəsizlik qüvvələrinə hücumlar təşkil ediblər. Təhlükəsizlik naziri Omar Qarsiya Harfuç bildirib ki, qarşıdurmalar zamanı 30 kartel üzvü və bir mülki şəxs həlak olub, yeddi ştat üzrə azı 70 nəfər saxlanılıb.
Müdafiə Nazirliyinin məlumatına görə, Xalisko ştatındakı hücumlar Oseqeranın sağ əli və kartelin əsas maliyyə rəhbəri hesab olunan, “El Tuli” ləqəbi ilə tanınan şəxs tərəfindən koordinasiya edilib. O da saxlanılmağa cəhd göstərilərkən təhlükəsizlik qüvvələri ilə toqquşma zamanı öldürülüb.
Hakimiyyət orqanları kartelin mümkün yenidən təşkilatlanması və ya qisas xarakterli hücum ehtimalını nəzərə alaraq vəziyyəti yaxından izlədiklərini bildiriblər.
Əməliyyat zamanı ABŞ kəşfiyyat məlumatlarının Oseqeranın dəqiq yerləşdiyi ərazinin müəyyənləşdirilməsində kömək etdiyi qeyd olunub. Bununla belə, Klaudiya Şeynbaum vurğulayıb ki, əməliyyat tam şəkildə Meksika tərəfindən həyata keçirilib və ABŞ qüvvələri yalnız məlumat mübadiləsində iştirak edib.
Poliqon.info
