Venesuela hökuməti Panama paytaxtının hava limanında diplomatik poçtun açılmasını qətiyyətlə pisləyib və Panama hakimiyyətini diplomatik fəaliyyəti tənzimləyən normalara ciddi əməl etməyə çağırıb.
AFN.az-ın məlumatına görə, bu barədə Venesuela xarici işlər naziri İvan Xil Pintonun "Telegram" kanalında paylaşılan rəsmi kommünikedə bildirilir. Sənəddə qeyd olunur ki, 24 fevral 2026-cı il tarixində Panamanın "Tokumen" beynəlxalq hava limanında Venesuelaya məxsus diplomatik poçtun məcburi şəkildə açılması hadisəsi qeydə alınıb.
Kommünikedə vurğulanır ki, Panama hakimiyyətinin bu hərəkəti 1961-ci il tarixli Diplomatik Münasibətlər haqqında Vyana Konvensiyasının müddəalarını kobud şəkildə pozur. Sözügedən konvensiyaya əsasən, diplomatik poçt toxunulmazdır, o, heç bir halda açıla və ya saxlanıla bilməz.
Venesuela hökuməti Panamadan diplomatik poçtun toxunulmazlığına dair rəsmi zəmanət tələb edib və beynəlxalq konsulluq qaydalarına riayət olunmasının vacibliyini bir daha xatırladıb. Hadisənin iki ölkə arasındakı diplomatik gərginliyi daha da artıracağı ehtimal olunur.
