Pentaqon vəsaiti Hind-Sakit okean komandanlığının imkanlarının gücləndirilməsinə və adaya göndərilən silahların əvəzlənməsinə yönəldəcək...
ABŞ Müdafiə Nazirliyi Tayvana göstərilən hərbi yardım üçün istifadə olunan silah ehtiyatlarının bərpası məqsədilə Hind-Sakit okean komandanlığına 850 milyon dollar ayırmağı planlaşdırır.
Poliqon xəbər verir ki, bu barədə Taipei Times nəşri Pentaqonun ABŞ Konqresinə təqdim etdiyi xərclər planına istinadən məlumat yayıb.
Qərarın Tayvanın davamlılığının artırılması haqqında qanuna uyğun qəbul edildiyi bildirilir. Həmin qanun ABŞ-yə Müdafiə Nazirliyinin ehtiyatlarında olan avadanlıqları birbaşa ada rəhbərliyinə ötürməyə və tədarük prosesini sürətləndirməyə imkan verir. Ayrılan vəsait birgə əməliyyat qruplarının döyüş imkanlarının gücləndirilməsinə və Tayvana göndərilən texnikanın əvəzinə yeni avadanlıqların alınmasına sərf olunacaq.
ABŞ Konqresinin Tədqiqat Xidmətinin 3 fevral tarixli hesabatına istinadən bildirilir ki, 2015–2025-ci illər ərzində icra hakimiyyəti Tayvana 39 milyard dollardan artıq həcmdə hərbi texnika tədarükü barədə Konqresi məlumatlandırıb. Bundan əlavə, Prezidentin fövqəladə səlahiyyət mexanizmi çərçivəsində Tayvan üçün ümumi dəyəri 1,5 milyard dollar olan üç yardım paketi elan edilib.
ABŞ uzun illərdir Tayvanın əsas və daimi silah təchizatçısı olaraq qalır. Bu siyasət Çin tərəfindən kəskin tənqidlə qarşılanır və regionda gərginliyin artmasına səbəb olur. Ada administrasiyasının rəhbəri Lay Sinde əlavə olaraq 40 milyard dollarlıq hərbi büdcə formalaşdırıldığını açıqlayıb. Onun sözlərinə görə, 2026-cı ildə müdafiə xərclərinin ümumi daxili məhsulun 3 faizinə çatdırılması, 2030-cu ilə qədər isə bu göstəricinin 5 faizə yüksəldilməsi planlaşdırılır.
Çinli hərbi mütəxəssislərin hesablamalarına əsasən, son illərdə ABŞ-nin Tayvana hərbi tədarükünün ümumi həcmi 70 milyard dolları ötüb.
Poliqon.info
