Donald Tramp administrasiyası Qara dənizdə, Novorossiysk rayonu ərazisində yerləşən Rusiya neft obyektinə hücumdan sonra Ukraynaya rəsmi diplomatik demarş təqdim edib...
Poliqon xəbər verir ki, bu barədə Ukraynanın ABŞ-dakı səfiri Olqa Stefanişina brifinqdə bildirib.
Onun sözlərinə görə, ABŞ Dövlət Departamenti ötən ilin sonunda Ukraynanın Novorossiyskə endirdiyi zərbələrin Qazaxıstan üzərindən həyata keçirilən Amerika investisiyalarına təsir etdiyini bildirib.
"Dövlət Departamentindən eşitdik ki, biz Amerika maraqlarına hücumlardan çəkinməliyik", deyə Stefanişina qeyd edib.
O, söhbətin ümumilikdə Rusiyanın hərbi və ya enerji infrastrukturuna zərbələrin qadağan olunmasından deyil, məhz ABŞ-ın iqtisadi maraqlarından getdiyini dəqiqləşdirib: "Biz bunu nəzərə aldıq".
Noyabrın sonunda Ukrayna pilotsuz uçuş aparatları Novorossiysk limanına hücum edib. Zərbə nəticəsində infrastruktur, o cümlədən Qazaxıstan neftini Qara dənizə daşıyan əsas boru kəməri zədələnib.
Xəzər Boru Kəməri Konsorsiumunun əsas səhmdarı "Chevron" şirkətidir. Hücumdan sonra Qazaxıstan neftinin ixracı əhəmiyyətli dərəcədə azalıb ki, bu da ABŞ-ın iqtisadi maraqlarına təsir göstərib.
Səfir bildirib ki, Dövlət Departamentinin müraciətində hazırda ABŞ-ın Qazaxıstanda əhəmiyyətli iqtisadi maraqlara malik olduğu, lakin Ukraynada belə maraqların olmadığı vurğulanıb.
"Mən çox təəssüf edirəm ki, Ukraynanın müstəqilliyinin 35 ili ərzində biz eyni vəziyyətə nail ola bilməmişik", deyə o bildirib.
Demarş Rusiyanın genişmiqyaslı işğalının dördüncü ildönümü fonunda baş verib. ABŞ vasitəçiliyi ilə aparılan sülh danışıqları hələlik irəliləyiş verməyib və döyüş əməliyyatları davam edir.
Stefanişina, həmçinin, müharibənin əvvəlində Moskvaya qarşı təzyiqlərin yetərli olmadığını tənqid edib: "Biz Ukraynanın sağ qalması üçün kifayət qədər iş gördük, lakin Rusiyanın təkamül etməməsi üçün yetərli addımlar atmadıq".
Səfir ABŞ Konqresini Rusiyaya qarşı sanksiyaların gücləndirilməsini nəzərdə tutan qanunu qəbul etməyə çağırıb və sənədin gecikdirilməsinin Moskvada qələbə kimi qəbul edildiyini vurğulayıb.
Poliqon.info
