ABŞ-İran arasında olan müharibə çoxşaxəli xarakter daşıyaraq iqtisadi sahədə də ciddi təsirlər yaradır. Qarşıdurma Azərbaycan bazarına da təsirsiz ötüşmür. Belə ki, Azərbaycan bazarında kifayət qədər İran mənşəli məhsulların satılması və əhəmiyyətli paya malik olması iqtisadi çətinliklər riskini artırır.
Mövzu ilə bağlı Pravda.az-a açıqlama verən iqtisadçı Eyyub Kərimli bildirib ki, İranla Azərbaycan arasında ticarət dövriyyəsi 650 milyon dollara yaxındır və bunun daha çox hissəsini İrandan idxal təşkil edir:
“İdxalın strukturuna baxanda daha çox tikinti materiallarının təşkil etdiyini görürük. Ərzaq mallarının payı 30 faizi ötmür. Müharibənin müddəti uzanarsa, müəyyən çətinliklər yarana bilər. İdxalın həcmini nəzərə alsaq, hesab edirəm ki, digər ölkələrdən təmin oluna bilər. Hələ ki İran ilə Azərbaycan arasında idxal, ixrac əməliyyatlarına ciddi təhdid yoxdur. Bu gələcəkdə, qeyd etdiyim kimi, İranda baş verən hadisələrin formasından asılı olacaq. Lakin müəyyən məhdudiyyət baş verə bilər. İran bizim qonşumuzdur. İstənilən halda idxal, ixrac əməliyyatları yenə də davam edəcək. Adətən İrandan Azərbaycana idxal olunan məhsullar münaqişənin getmədiyi əyalətlərdən baş verir. Qiymətlərdə kiçik dəyişikliklər, məhdudiyyətlər ola bilər, ancaq zənn edirəm uzunmüddətli xarakter almayacaq”.
Şəhanə Quliyeva
