İsrailin radioelektron kəşfiyyat bölməsi Tehranın kamerlarını və rabitə şəbəkələrini ələ keçirib, ABŞ-nin isə Xameneinin ətrafında insan mənbəyi olub...
Poliqon xəbər verir ki, “Financial Times” nəşri İranın ali rəhbəri Əli Xameneinin öldürülməsi ilə nəticələnən əməliyyatın detalları barədə geniş araşdırma dərc edib. Məlumata görə, əməliyyatda İsrailin yüksək effektiv radioelektron kəşfiyyat bölməsi – 8200 iştirak edib. Nəşr yazır ki, məhz bu bölmənin topladığı məlumatlar şənbə günü səhər həyata keçirilən hücuma zəmin yaradıb.
Qeyd olunur ki, Tehran şəhərində yollar boyunca quraşdırılmış müşahidə kameralarının demək olar ki, hamısı ələ keçirilib və bu kameralardan əldə olunan görüntülər iillər ərzində İsrail tərəfinə ötürülüb. Xameneinin iqamətgahının yaxınlığında yerləşən kameralardan biri xüsusi rakursa malik olub və ciddi mühafizə olunan kompleksin daxilinə müəyyən qədər nəzarət etməyə imkan verib. Bildirilir ki, bu kamera vasitəsilə mühafizə əməkdaşlarının avtomobilləri harada saxladıqları belə izlənilib. Şənbə səhəri mühafizəçilər iqamətgaha gəldikdə, İsrail kəşfiyyatı onların hərəkətlərini real vaxt rejimində müşahidə edib.
İsrailli mənbənin sözlərinə görə, genişmiqyaslı videomüşahidə şəbəkəsinin ələ keçirilməsi nəticəsində İsrail kəşfiyyatı “Tehranı Yerusəlim qədər yaxşı tanıyııb”. Bu ifadə əməliyyatın planlaşdırılmasında texnoloji üstünlüyün həlledici rol oynadığını göstərir.
Nəşr həmçinin qeyd edir ki, hücum zamanı İsrail tərəfi iqamətgah yaxınlığındakı mobil rabitə qüllələrinin bəzi komponentlərini sıradan çıxarmağa nail olub. Bunun nəticəsində telefon xətləri daimi məşğul vəziyyətdə olub və mühafizə heyəti mümkün xəbərdarlıq siqnalını vaxtında ala bilməyib. Bu amilin əməliyyatın uğurla icrasında mühüm rol oynadığı bildirilir.
Məlumata görə, İrana qarşı hücum bir neçə ay ərzində planlaşdırılıb. Lakin ABŞ və İsrail planlarını son anda dəqiqləşdiriblər. Buna səbəb Xameneinin şənbə günü səhər yüksək vəzifəli rəsmilərlə görüş keçirəcəyinə dair dəqiq kəşfiyyat məlumatının əldə olunması olub. Tərəflər hesab ediblər ki, hərbi əməliyyatlar başladıqdan sonra həmin şəxsləri izləmək daha çətin olacaq, çünki onlar sığınacaqlara çəkilə bilərlər.
Görüşün təsdiqlənməsi üçün İsrail tərəfi sındırılmış müşahidə kameralarından və mobil şəbəkələrə müdaxilədən istifadə edib. ABŞ tərəfinin isə “daha konkret” məlumata – insan mənbəyinə malik olduğu vurğulanır. Bununla bağlı əlavə detallar açıqlanmayıb.
Hazırda nə ABŞ, nə də İsrail rəsmiləri yayılan məlumatlara dair rəsmi şərh verməyib. Ekspertlər hesab edirlər ki, bu cür texnoloji və kəşfiyyat imkanlarının tətbiqi regionda münaqişələrin xarakterini dəyişdirir və kiberməkanda aparılan əməliyyatların ənənəvi hərbi strategiyalarla birləşdiyini göstərir.
Poliqon.info
