Hücum Əş-Şuayba limanında yerləşən müvəqqəti əməliyyat mərkəzinə qarşı həyata keçirilib...
Poliqon xəbər verir ki, CNN telekanalının yaydığı məlumata əsasən, İranın pilotsuz uçuş aparatı (PUA) ilə həyata keçirdiyi zərbə nəticəsində altı amerikalı hərbçi həlak olub. Bildirilir ki, hadisə bazar günü səhər saatlarında Küveyt ərazisində qeydə alınıb.
Məlumata görə, zərbə Küveytin Əş-Şuayba limanının ərazisində yerləşən improvizə olunmuş əməliyyat qərargahına endirilib. Qərargah üç bölmədən ibarət modul tipli treylerdə yerləşib və daxilində ofis otaqları fəaliyyət göstərib. Mənbənin sözlərinə görə, hücum qəfil baş verib, əvvəlcədən heç bir xəbərdarlıq və ya hava hücumu siqnalı verilməyib. Hadisə zamanı ərazidə onlarla hərbçi və personal üzvü olub.
CNN qeyd edir ki, zərbə nəticəsində altı hərbçi həyatını itirib. Bundan əlavə, İrana qarşı aparılan hərbi əməliyyat çərçivəsində daha 18 amerikalı hərbçinin ağır yaralandığı bildirilir. Lakin onların harada yaralandığı barədə hələlik dəqiq məlumat açıqlanmayıb.
Hazırda ABŞ Müdafiə Nazirliyi tərəfindən rəsmi açıqlama verilməyib. Bununla yanaşı, regionda təhlükəsizlik vəziyyətinin gərgin olaraq qaldığı və ABŞ qüvvələrinin Yaxın Şərqdəki obyektlərində əlavə təhlükəsizlik tədbirlərinin gücləndirildiyi ehtimal olunur.
Analitiklər hesab edirlər ki, diplomatik və hərbi obyektlərə qarşı belə hücumlar regionda eskalasiya riskini artırır və qarşılıqlı cavab tədbirlərinin genişlənməsinə səbəb ola bilər. Küveytin strateji mövqeyi və Əş-Şuayba limanının hərbi-logistik əhəmiyyəti nəzərə alınaraq, bu hadisə beynəlxalq səviyyədə ciddi rezonans doğura bilər.
Poliqon.info
