ain.az, Lent az portalından verilən məlumatlara əsaslanaraq xəbər verir.
“El Menço” ləqəbi ilə tanınan və Meksikanın “Xalisko Yeni Nəsil” narkokartelinin rəhbəri kimi təqdim olunan Ruben Osegera Servantesin qalıqları Xalisko ştatının Sapopan bələdiyyəsində yerləşən qəbiristanlığa qızılı tabutda gətirilib.
Lent.az xarici KİV-ə istinadla bildirir ki, matəm korteji martın 2-si səhər saatlarında ştatın paytaxtı Qvadalaxaradakı dəfn bürosundan yola düşüb. Dəfn mərasimi qapalı şəkildə, kənar şəxslərin iştirakı olmadan keçirilib.
Cəsədin daşınması və dəfni genişmiqyaslı təhlükəsizlik tədbirləri ilə müşayiət olunub. Kortejin marşrutu və qəbiristanlıq ərazisi federal və regional güc strukturları tərəfindən qorunub. Mümkün insidentlərin qarşısını almaq üçün dəfn bürosunun qarşısında hərbçilər və ordunun zirehli texnikası növbə çəkib.
Meksikanın Milli Müdafiə Nazirliyi fevralın 22-də El Mençonun zərərsizləşdirildiyini rəsmi şəkildə elan edib. Qurumun məlumatına görə, o, Tapalpa şəhəri yaxınlığında təhlükəsizlik qüvvələri ilə silahlı toqquşma zamanı ağır yaralanıb və xəstəxanaya aparılarkən yolda dünyasını dəyişib.
Xüsusi əməliyyatdan sonra ölkə üzrə çoxsaylı yol bağlanmaları, avtomobillərin və kommersiya obyektlərinin yandırılması halları qeydə alınıb. Meksika prezidenti Klaudiya Şeynbaum fevralın 23-nə olan məlumata əsasən, ictimai təhlükəsizlik sahəsində vəziyyətin tam nəzarət altına alındığını bildirib.
Sonrakı hadisələr barədə daha çox məlumat almaq üçün ain.az saytını izləyin.
