İran ABŞ və İsraillə münaqişənin kəskinləşməsinin başlanmasından bəri 35 PUA-nı vurub » AzadMedia.az

İran son 24 saat ərzində altı müasir pilotsuz uçuş aparatını (PUA) məhv edib. Bu barədə Pars Today məlumat yayıb.

İran İslam Respublikasının ordusunun bəyanatına əsasən, “Hermes” tipli pilotsuz aparatların ölkənin İsfahan, Qəsr-Şirin, Təbriz, Xuzistan bölgələrində və Tehran ətrafında yerləşən “Xatəm əl-Ənbiya” birləşmiş hava hücumundan müdafiə qərargahının sistemləri tərəfindən vurulduğu bildirilib.

Açıqlamada qeyd olunur ki, son müharibənin başlanğıcından indiyədək düşmənə məxsus 35 müasir PUA, o cümlədən RQ-19, Heron, Hermes, Orbiter və digər aparatları quru qoşunlarının hava hücumundan müdafiə bölmələri, Hərbi Hava Qüvvələrinin qırıcıları və İslam İnqilabı Keşikçiləri Korpusu (SEPAH) bölmələri vahid hava müdafiə şəbəkəsi çərçivəsində aşkarlayaraq məhv ediblər.

Eyni zamanda, Tasnim News Agency İran İslam İnqilabı Keşikçiləri Korpusunun bəyanatına istinadən xəbər verir ki, Qərbi Asiya regionunda yerləşən ikinci ABŞ-a məxsus THAAD raketdən müdafiə sistemi SEPAH-ın yüksək dəqiqlikli raket zərbəsi nəticəsində vurularaq sıradan çıxarılıb.

Məlumata görə, bundan əvvəl BƏƏ-nin Əl-Ruveys bazasında yerləşdirilmiş THAAD sisteminin radiolokasiya stansiyası da məhv edilib.

Bəyanatda bildirilir ki, hər iki sistemin sıradan çıxarılması ilə İranın raket qüvvələrinin hədəfləri uğurla vurmaq imkanları bərpa olunub.