Abbas Əraqçi: ABŞ beynəlxalq sularda İranın “Dena” freqatına hücum edib və bunun nəticələrinə görə peşman olacaq...
Poliqon xəbər verir ki, İranın xarici işlər naziri Abbas Əraqçi ABŞ-ni İran Hərbi Dəniz Qüvvələrinə məxsus freqatı batırmaqda ittiham edib və Vaşinqtonun bunun nəticələrinə görə peşman olacağını bildirib.
Nazir sosial şəbəkədə paylaşdığı açıqlamada qeyd edib ki, ABŞ qüvvələri beynəlxalq sularda İranın Dena freqatına hücum edərək onu məhv edib. Onun sözlərinə görə, gəmi Hindistan Hərbi Dəniz Qüvvələrinin qonağı kimi səfərdə olub və göyərtəsində təxminən 130 dənizçi olub.
“ABŞ dənizdə vəhşilik törədib – İran sahillərindən 2000 mil uzaqlıqda. Hindistan Hərbi Dəniz Qüvvələrinin qonağı olan və təxminən 130 dənizçi daşıyan ‘Dena’ freqatı beynəlxalq sularda xəbərdarlıq edilmədən vurulub. Sözlərimi yadda saxlayın: ABŞ yaratdığı bu presedentə görə acı şəkildə peşman olacaq”, deyə Əraqçi vurğulayıb.
İran rəsmisinin sözlərinə görə, bu hadisə beynəlxalq hüququn və dəniz təhlükəsizliyi prinsiplərinin ciddi şəkildə pozulmasıdır. Tehran hesab edir ki, belə addımlar regionda gərginliyi daha da artırır və beynəlxalq sularda təhlükəsizlik üçün risk yaradır.
Analitiklərin fikrincə, İran və ABŞ arasında qarşıdurmanın dəniz məkanına yayılması Yaxın Şərqdə hərbi eskalasiyanın yeni mərhələyə keçdiyini göstərir. Ekspertlər belə insidentlərin regiondakı enerji marşrutları və beynəlxalq ticarət üçün əlavə risklər yarada biləcəyini bildirirlər.
Poliqon.info
