İran qadın futbol yığmasının bir neçə üzvü Avstraliyada sığınacaq istədiklərini açıqlayıb.
Musavat.com xəbər verir ki, bu barədə beynəlxalq media resurslarında məlumat yayılıb.
Məlumata görə, vəziyyət İran yığmasının Avstraliyada keçirilən Asiya kuboku oyunları zamanı yaşanan hadisədən sonra gərginləşib. Bildirilir ki, komandanın bəzi üzvləri oyunlardan əvvəl səsləndirilən İran dövlət himnini oxumaqdan imtina ediblər.
Bu addım İran daxilində ciddi reaksiyaya səbəb olub. Sosial şəbəkələrdə və bəzi media platformalarında həmin futbolçular “xəyanətkar” kimi təqdim olunmağa başlayıb.
Hüquq müdafiəçiləri isə iddia edirlər ki, idmançılar vətənə qayıdacaqları halda təzyiq və ya cəza ilə üzləşə bilərlər. Bu səbəbdən onların təhlükəsizliyinin təmin olunması üçün sığınacaq verilməsi çağırışları səsləndirilir.
Məsələ ilə bağlı bəzi beynəlxalq siyasətçilər də mövqe bildiriblər. Onlardan biri Avstraliya hökumətini futbolçuların ölkəyə qaytarılmaması barədə xəbərdar edib və bildirib ki, onların İrana geri göndərilməsi humanitar baxımdan ciddi səhv ola bilər.
“Cənab baş nazir, bunu etməyin. Onlara sığınacaq verin. Əgər siz qəbul etməsəniz, ABŞ bunu etməyə hazırdır”, – deyə o bildirib.
Hazırda məsələ Avstraliya hökuməti tərəfindən araşdırılır və futbolçuların gələcək taleyi ilə bağlı qərarın yaxın vaxtlarda açıqlanacağı gözlənilir.
Musavat.com
