BAKI, TurkicWorld, Orxan Qədirzadə
Türkiyə prezidenti Rəcəb Tayyib Ərdoğan Mehdi Ekerin Birləşmiş Millətlər Təşkilatının Ərzaq və Kənd Təsərrüfatı Təşkilatının baş direktoru vəzifəsinə namizədliyinin irəli sürüldüyünü açıqlayıb.
TurkicWorld xəbər verir ki, dövlət başçısı bu barədə 17-ci Ənənəvi Səfirlər İftar Proqramında çıxışı zamanı məlumat verib. Ərdoğan bildirib ki, müasir dövrdə dünyanın qarşılaşdığı ən ciddi problemlərdən biri ərzaq təhlükəsizliyidir və bu sahədə beynəlxalq təşkilatlarla sıx əməkdaşlıq aparılır.
Prezident qeyd edib ki, Türkiyə Birləşmiş Millətlər Təşkilatının qurumları ilə koordinasiyalı şəkildə qlobal ərzaq təhlükəsizliyi məsələsinin həlli istiqamətində aktiv siyasət yürüdür.
Ərdoğan çıxışında Mehdi Ekerin bu sahədə uzun illər ərzində topladığı təcrübəyə diqqət çəkərək onun BMT-nin Ərzaq və Kənd Təsərrüfatı Təşkilatına rəhbərlik üçün güclü namizəd olduğunu bildirib.
Dövlət başçısı beynəlxalq ictimaiyyəti də bu namizədliyi dəstəkləməyə çağırıb və qlobal ərzaq təhlükəsizliyinin təmin olunmasının bütün ölkələrin ortaq marağı olduğunu vurğulayıb.
