Almaniyada arxeoloqlar sirli bir kultla bağlı nadir Roma dövrü məbədinin qalıqlarını aşkar ediblər...
Poliqon Fox News-a istinadən xəbər verir ki, tədqiqatçıların sözlərinə görə, bu, Bavariya ərazisində bu tipə aid ən qədim məlum məbəddir.
Tikilinin qalıqları çoxmərtəbəli yaşayış binalarının tikintisi üçün ərazinin hazırlanması zamanı Reqensburq şəhərində aşkar edilib. Məbəd eramızın I və ya II əsrində inşa olunub və işıq və kosmik nizamla əlaqələndirilən "misteriya kultu"nun əsas fiquru olan Mitraya həsr edilib.
Mitra kultu Roma imperiyasında eramızın II–III əsrlərində geniş yayılıb və erkən xristianlıqla paralel mövcud olub.
Reqensburq şəhər arxeologiya xidmətinin arxeoloqu Yohannes Zebrix bildirib ki, bu tapıntı çox nadirdir və Bavariya üçün demək olar unikaldır. Onun sözlərinə görə, məbəddə tapılan sikkələrin analizi göstərib ki, bu, regionda indiyədək aşkar edilmiş doqquz Mitra məbədinin ən qədimidir.
Tədqiqatçı izah edib ki, bu kult Kiçik Asiyadan Roma imperiyasına mədəni əlaqələr vasitəsilə yayılıb. Mitraizm adlanan bu dini cərəyanın üzvlərinə xüsusi mərasimlər zamanı “gizli biliklər” ötürülürdü.
Zebrixin sözlərinə görə, ardıcıllar yeddi mərhələli təşəbbüs (initiasiya) pilləsindən keçə bilirdilər. Bu mərhələlər “səmavi pilləkən”lə ən yüksək bilik səviyyəsinə qalxmanı simvolizə edirdi.
"Bunu "ulduz kultu" və ya "misteriya kultu" kimi təsvir etmək olar. Bu gün də Roma tanrıları ilə bağlı ən maraqlı və eyni zamanda ən sirli kultlardan biri hesab olunur", deyə o bildirib.
Qazıntı sahəsində arxeoloqlar içki qabları, süfrə qabları və ərzaq saxlamaq üçün istifadə olunan qablar aşkar ediblər. Bundan başqa, ritual və ya tullantı quyularında heyvan sümükləri tapılıb. Tədqiqatçıların fikrincə, bu, mərasimlər zamanı yüksək keyfiyyətli qida qurban verildiyini və ya birlikdə yeyildiyini göstərir.
Əvvəlcə arxeoloqlar tikilinin əhəmiyyətini dərhal anlamayıblar. Sonrakı analizlərdən sonra məlum olub ki, bu, Mitra kultuna aid məbəd – mitreumdur. Ən mühüm tapıntılardan biri üzərində DEO INVICTO (Məğlubedilməz tanrıya) yazısı olan gümüş votiv lövhə olub. Bu titul yalnız Mitra üçün istifadə edilirdi.
Zebrixin sözlərinə görə, bu kult yalnız seçilmiş şəxslər üçün açıq idi, lakin üzvlük sosial statusdan asılı deyildi. Ardıcıllar arasında əsgərlər, veteranlar, tacirlər, qullar və azad edilmiş qullar var idi. Qadınlar isə adətən bu kultda iştirak etmirdi.
Mitra kultu V əsrdə, Roma imperiyasında xristianlıq dominant dinə çevrildikdən sonra tədricən yoxa çıxıb. Arxeoloqların fikrincə, məbəd eramızın 171-ci ildə Markoman müharibələri zamanı yanaraq məhv olub və daha sonra bərpa edilməyib. Hətta 179-cu ildə imperator Mark Avreli bu ərazidə hərbi düşərgə yaratdıqdan və ətraf yaşayış məntəqəsi genişləndikdən sonra da məbəd yenidən tikilməyib.
Tədqiqatçılar ehtimal edirlər ki, dağıntılar altından xilas edilən bəzi altarlar və kult əşyaları sonradan başqa məbədlərdə istifadə olunub.
Poliqon.info
