"İranın Körfəz ölkələrinə raket və dron hücumları ilə bağlı qeyd olunan rəqəmlər hədəf seçimini yalnız təsadüfi və ya simvolik addımlar kimi deyil, məqsədli və strateji planlaşdırılmış hərbi taktika kimi qiymətləndirməyə imkan verir. Strateji baxımdan BƏƏ-yə qarşı bu qədər hücumun bir neçə səbəbi ola bilər. Birincisi, BƏƏ regional enerji və iqtisadi mərkəz kimi İran üçün kritik önəm daşıyır. Dubay və Əbu-Dabi kimi şəhərlər yalnız neft və qaz bazarlarında deyil, həm də maliyyə, logistika və beynəlxalq ticarət sistemlərində mühüm rol oynayır. Hücumların intensivliyi İranın bu sahədə təsir imkanlarını artırmaq və regionda geosiyasi üstünlük əldə etmək istəyi ilə izah oluna bilər. Eyni zamanda, BƏƏ-nin ABŞ və İsrail ilə yaxın hərbi və siyasi əlaqələri İran üçün strateji təzyiq yaradır ki, bu da Tehranı hədəf seçimini prioritetləşdirməyə vadar edir. Məlumdur ki, BƏƏ ABŞ-nin əsas tərəfdaşlarından biridir və regiondakı hərbi və iqtisadi əməkdaşlıqda mühüm rol oynayır. İranın BƏƏ-yə qarşı hücumları yalnız Dubay və Əbu-Dabiyə deyil, həm də ABŞ-a dolayısı ilə mesaj göndərmək məqsədi daşıyır".
Bu fikirləri Aznews.az-a açıqlamasında siyasi şərhçi Rəşad Bayramov deyib.
Qeyd edək ki, məlumata görə, İran 2026‑cı ildə Körfəz regionunda, xüsusən Birləşmiş Ərəb Əmirliklərinə qarşı raket və pilotsuz uçuş aparatı (PUA) hücumlarını həyata keçirib. Rəsmi açıqlamalara əsasən, BƏƏ‑yə yönələn hücumlar əsasən ballistik raketlər, kruiz raketləri və dronlardan ibarət olub. Təqribi statistikaya görə, bu dövrdə İran BƏƏ istiqamətində təxminən 174 ballistik raket, 8 kruiz raketi və 689 dron buraxıb. Bu hücumların böyük əksəriyyəti BƏƏ Müdafiə Qüvvələri tərəfindən qarşısı alınıb və vurulub, lakin bəzi raket və dronlar ölkə daxilində təsir göstərib. Bu rəqəmlər göstərir ki, BƏƏ İranın Körfəz regionunda ən çox hədəf seçdiyi ölkələrdən biridir.
Siyasi şərhçi qeyd edib ki, bu hücumlar Tehranın regional məsələlərdə ABŞ-nin maraqlarına təsir göstərə biləcəyini və diplomatik manevr imkanlarını sınaqdan keçirə biləcəyini göstərir.
