Fransa Prezidenti Emmanuel Makron martın 18-də Nant yaxınlığındakı İndre bölgəsində inşa edilən yeni aviadaşıyıcının tikinti sahəsinə səfər edəcək.
Publika.az xəbər verir ki, bu səfər zamanı dövlət başçısının gələcək gəminin adını açıqlayacağı gözlənilir. Yeni aviadaşıyıcı hazırda Fransa donanmasının əsas gəmisi olan “Charles de Gaulle”u əvəz edəcək. Prezident tərəfindən ötən ilin dekabrında rəsmiləşdirilən layihəyə əsasən, yeni gəmi əvvəlki modeldən xeyli böyük olacaq. Onun yerdəyişməsi 80 min ton, uzunluğu isə təxminən 310 metr olacaq. Müqayisə üçün mövcud aviadaşıyıcının çəkisi 42 min ton, uzunluğu isə 261 metrdir.
Yeni gəmidə təxminən 2000 nəfərlik ekipaj xidmət edəcək və o, 30 döyüş təyyarəsini daşımaq imkanına malik olacaq.
Makronun səfəri “Naval Group” şirkətinin İndredə yerləşən istehsal sahəsində baş tutacaq. Məhz burada gələcək aviadaşıyıcının iki nüvə reaktoru istehsal ediləcək.
Gəminin əsas montajı “Chantiers de l’Atlantique” tərsanəsində, Nant yaxınlığındakı Saint-Nazaire şəhərində həyata keçiriləcək.
