Seçkilər ərəfəsində paytaxtda həm Viktor Orbanın tərəfdarları, həm də müxalifətin təşkil etdiyi aksiyalar on minlərlə insanı bir araya gətirib...
Poliqon xəbər verir ki, Macarıstanın paytaxtı Budapeştdə seçkilər ərəfəsində eyni gündə iki böyük siyasi mitinq keçirilib. Aksiyalardan biri hakimiyyət tərəfdarlarının təşkil etdiyi “Sülh yürüşü”, digəri isə müxalifətin təşkil etdiyi “Milli yürüş” olub.
“Sülh yürüşü” Macarıstanın baş naziri Viktor Orbanın tərəfdarları tərəfindən təşkil olunub. Aksiyanın əsas məqsədi hökumət siyasətinə dəstək nümayiş etdirmək və ölkədə mövcud siyasi kursun davam etdirilməsini tələb etmək olub.
Mitinqdə çıxış edən Viktor Orban bildirib ki, hökumətin əsas məqsədi ölkədə sabitliyi qorumaq və Macarıstanın beynəlxalq münaqişələrə cəlb olunmasının qarşısını almaqdır. O vurğulayıb ki, Budapeşt ölkəni qeyri-sabit beynəlxalq mühitdə təhlükəsizlik və sabitlik adasına çevirmək niyyətindədir.
“Biz öhdəlik götürürük ki, belə turbulent dünyada Macarıstanı təhlükəsizlik və sakitlik adası kimi qoruyub saxlayacağıq. Biz müharibəyə qoşulmamalıyıq”, deyə Orban tərəfdarları qarşısında çıxışı zamanı bildirib.
Eyni zamanda Budapeştdə müxalif qüvvələrin təşkil etdiyi “Milli yürüş” də keçirilib. Bu aksiya “Tisa” partiyasının lideri Peter Madyarın təşəbbüsü ilə təşkil olunub. Mitinq iştirakçıları hökumətin siyasətini tənqid edib və ölkədə siyasi dəyişikliklərin vacibliyini vurğulayıblar.
Macarıstan Turizm Agentliyinin mobil cihazların analizi əsasında təqdim etdiyi məlumatlara görə, Viktor Orbanın dəstəkləndiyi “Sülh yürüşü”nə təxminən 180 min nəfər qatılıb. Müxalifətin təşkil etdiyi “Milli yürüş”də isə təxminən 150 min nəfərin iştirak etdiyi bildirilir.
Bu məlumatlar Rusiya TASS agentliyi tərəfindən də yayımlanıb. Analitiklərin fikrincə, Budapeştdə keçirilən bu iki böyük aksiya ölkədə qarşıdan gələn seçkilər fonunda siyasi rəqabətin və ictimai mobilizasiyanın yüksək səviyyədə olduğunu göstərir.
Poliqon.info
