İran Hörmüz boğazının tranziti ilə bağlı açıqlama verib və ABŞ və İsrail istisna olmaqla, bütün ölkələrin gəmilərinin təhlükəsiz keçidinə icazə verildiyini bildirib. Vətəninfo.az xəbər verir ki, bu barədə İran İslam İnqilabı Keşikçiləri Korpusu martın 2-də başlayan blokada sonrası qismən yumşaldılma tədbirləri çərçivəsində açıqlama verib.
İranın xarici işlər naziri Abbas Əraqçi bildirib ki, bir sıra ölkələr təhlükəsiz keçid üçün müraciət edib və hərbi bölmələrin qiymətləndirməsindən sonra müxtəlif ölkələrdən olan gəmilərin boğazdan keçməsinə icazə verilib.
Hörmüz boğazından tranzit icazəsi alan və danışıqlar aparan ölkələr belədir:
Türkiyə: Nəqliyyat və İnfrastruktur naziri Əbdülqədir Uraoğlu bildirib ki, İranın yaxınlığında gözləyən gəmi boğazdan təhlükəsiz keçib.
Pakistan: “Karaçi” tankeri bazar günü boğazdan keçərək Körfəzdən çıxıb.
Hindistan: İranın Hindistandakı səfiri bəzi Hindistan gəmilərinə müstəsna tranzit icazələrinin verildiyini təsdiqləyib. Hindistan hakimiyyəti mayeləşdirilmiş neft qazı daşıyan iki tankerin təhlükəsiz şəkildə səyahətinə davam etdiyini açıqlayıb.
Çin: Enerji ehtiyaclarının 45%-ni bu marşrut vasitəsilə ödəyən Çin İranla mayeləşdirilmiş təbii qaz gəmilərinin tranziti üzrə danışıqlar aparır.
Fransa və İtaliya: Hər iki Avropa ölkəsi Tehranla gəmilərinin təhlükəsiz keçidi üçün danışıqlar aparıb.
ABŞ Prezidenti Donald Tramp isə Hörmüz boğazının təhlükəsizliyini təmin etmək məqsədilə Çin, Fransa, Yaponiya, Cənubi Koreya və İngiltərə ilə tərəfdaşlıq etməyə çalışsa da, heç bir ölkədən əməliyyatda iştirak təsdiqi gəlməyib.
Almaniya və Yunanıstanın mövqeyi də diqqət çəkib. Böyük Britaniyanın Baş naziri Keir Starmer hərbi müdaxiləni rədd edib və ölkəsinin müharibəyə cəlb olunmayacağını bəyan edib.
Analitiklər bildirirlər ki, ABŞ-ın müttəfiqlərinin əksəriyyəti əvvəlcədən müharibəyə qarşı idi və buna görə də hərbi koalisiyanı dəstəkləməkdə tərəddüd ediblər.
