Son dövrlərdə qızılın qiymətində müşahidə edilən artım vətəndaşlar arasında investisiya seçimləri ilə bağlı sualları aktuallaşdırıb. Bahalaşan qızıl bir çoxları üçün cəlbedici yatırım vasitəsi kimi dəyərləndirilsə də, bank əmanətlərinin təklif etdiyi faiz gəlirləri də diqqətdən kənarda qalmır.
Mövcud vəziyyətdə vətəndaşlar hansı seçimə üstünlük verməlidirlər?
Mövzu ilə bağlı Pravda.az-a açıqlama verən Liberal İqtisadçılar Mərkəzinin sədri Akif Nəsirli bildirib ki, hazırkı şəraitdə, yəni qlobal gərginlik və inflyasiya artımı fonunda qızılın qiyməti bahalaşıb, buna görə də qızıl müəyyən dərəcədə “təhlükəsiz liman” hesab olunur:
“Qızıl uzun müddət saxlanıldıqda pulun dəyərini qorumağa kömək edə bilər, amma likvidliyi depozit qədər yüksək deyil və qiymət dalğalanmaları da ola bilər. Depozit isə faiz gətirir və banka qoyulan məbləğ sabit faizlədirsə, gəlir daha proqnozlaşdırılandır. Lakin inflyasiya yüksəkdirsə, depozitdən əldə olunan real gəlir qızıl ilə müqayisədə aşağı qala bilər. Qısamüddətli perspektivdə pul depozit daha stabil və rahatdır, uzunmüddətli və dəyəri qorumağa üstünlük verirsinizsə, qızıl almaq sərfəli ola bilər. Həmçinin, hər iki variantı balanslı şəkildə qarışdırmaq riskləri azaltmaq baxımından məntiqli sayılır”.
Şəhanə Quliyeva
