Səudiyyə Ərəbistanının paytaxtı Ər-Riyad şəhərində Azərbaycan da daxil olmaqla 12 ölkənin xarici işlər nazirləri və yüksək səviyyəli nümayəndələrinin iştirakı ilə məsləhətləşmə xarakterli toplantı baş tutub.
BAKU.WS-in məlumatına görə, bu barədə Səudiyyə Ərəbistanının Xarici İşlər Nazirliyi rəsmi açıqlama yayıb.
Açıqlamada qeyd olunur ki, görüşdə Azərbaycanla yanaşı Bəhreyn, Misir, İordaniya, Küveyt, Livan, Pakistan, Qətər, Səudiyyə Ərəbistanı, Suriya, Türkiyə və Birləşmiş Ərəb Əmirliklərinin nümayəndə heyətləri iştirak ediblər.
Toplantı zamanı İranın region ölkələrinə yönəlmiş hücumları geniş müzakirə olunub və bu addımlar kəskin şəkildə qınanılıb. İştirakçılar vurğulayıblar ki, hücumların dayandırılması gərginliyin azaldılması, bölgədə sabitliyin bərpası və təhlükəsizliyin təmin olunması üçün əsas şərtlərdən biridir. Eyni zamanda, mövcud böhranların həlli üçün diplomatik səylərin gücləndirilməsinin vacibliyi qeyd edilib.
Qeyd edək ki, iclasda Azərbaycanın xarici işlər naziri Ceyhun Bayramov da iştirak edib.
