Özbəkistanda Cizzax vilayətində tikilən ilk atom elektrik stansiyası (AES) yalnız ölkənin əsas enerji layihəsi olmaqla kifayətlənməyəcək, həm də hər il 3,5 milyard kubmetrdən çox qaz qənaətinə imkan verəcək.
Bu barədə çıxışında, Rusiya ilə diplomatik münasibətlərin qurulmasının 34 illiyinə həsr olunmuş tədbirdə Özbəkistan prezidentinin müşaviri müavini Rahim Hakimov məlumat verib.
Onun sözlərinə görə, ölkənin ilk AES-i daxili elektrik enerjisi tələbatının 15 faizədək hissəsini təmin edəcək. Stansiyanın istifadəyə verilməsi nəticəsində hər il təxminən 3,6 milyard kubmetr təbii qaza qənaət olunacaq.
Hakimov bildirib ki, Rosatom ilə tərəfdaşlıq çərçivəsində həyata keçirilən bu iri layihə ölkənin enerji balansını şaxələndirməyə, fosil yanacaqlardan asılılığı azaltmağa və atmosferə karbon emissiyalarını aşağı salmağa imkan verəcək.
Layihə çərçivəsində Cizzax vilayətinin Fariş rayonunda artıq hazırlıq işləri aparılır və “ilk beton”un tökülməsi üçün infrastruktur yaradılır. Bu barədə Özbəkistan prezidenti Şavkat Mirziyoyevin müşaviri də məlumat verib.
Xatırladaq ki, daha əvvəl Rosatom və “Uzatom” arasında Özbəkistanda ilk AES-in tikintisinə dair sənədlər imzalanıb. Yeni stansiya Cizzax vilayətində Tuzkan gölü yaxınlığında inşa olunacaq. Layihənin ilkin mərhələsində kiçik güclü AES, daha sonra isə VVER-1000 tipli iki enerji blokundan ibarət iri stansiyanın tikintisi planlaşdırılır. Gələcəkdə bu blokların sayının dördə çatdırılması da nəzərdə tutulur.
