Alimlər hipertoniyanın inkişafında mühüm rol oynaya biləcək bir beyin sahəsi aşkar ediblər. Söhbət beynin gövdəsində yerləşən və tənəffüs, ürək ritmi kimi əsas funksiyalara cavabdeh olan lateral parafasial zonadan gedir. Tədqiqat Circulation Research jurnalında dərc olunub.
Tədqiqatın rəhbəri, Oklend Universitetinin professoru Culyan Peytonun sözlərinə görə, bu sahə “məcburi” nəfəsvermə zamanı aktivləşir — məsələn, gülərkən, öskürərkən və ya fiziki fəaliyyət zamanı.
“Belə hallarda qarın əzələləri işə düşür, halbuki adi nəfəsvermə zamanı hava ağciyərlərin elastikliyi hesabına passiv şəkildə çıxır”, — deyə alim bildirib.
Tədqiqatçılar müəyyən ediblər ki, lateral parafasial zona damarların daralmasını tənzimləyən sinir yolları ilə əlaqəlidir. Bu isə birbaşa arterial təzyiqin səviyyəsinə təsir göstərir.
“Biz təzyiqin artmasına səbəb olan yeni bir beyin sahəsi aşkar etdik. Bu halda əsas rol həqiqətən də beyinə məxsusdur”, — deyə alim vurğulayıb.
Eksperiment göstərib ki, hipertoniyada bu sahə hiperaktiv olur. Alimlər onun fəaliyyətini zəiflətdikdə, təzyiq normal səviyyəyə düşüb. Tədqiqatçılar hesab edirlər ki, xüsusilə qarın əzələlərinin aktiv iştirakı ilə müşahidə olunan bəzi tənəffüs növləri təzyiqin artmasına səbəb ola bilər. Bu isə tənəffüs xüsusiyyətlərinin risk göstəricisi və diaqnostika aləti kimi istifadə olunmasına imkan yaradır.
Eyni zamanda, dərman vasitəsilə birbaşa beyinə təsir etmək çətin olaraq qalır, çünki preparatlar adətən bütün orqana təsir edir. Lakin alimlər alternativ yol tapıblar. Məlum olub ki, bu zonanın aktivliyi boyun nahiyəsində yerləşən və qandakı oksigen səviyyəsini izləyən karotid cisimciklərdən gələn siqnallarla tənzimlənir. Beyindən fərqli olaraq, bu strukturlara dərmanla təsir etmək mümkündür.
“Biz karotid cisimciklərin fəaliyyətini zəiflədən və bununla da dolayı yolla bu beyin sahəsini ‘söndürən’ dərmandan istifadə etməyi planlaşdırırıq”, — deyə Peyton əlavə edib.
Müəlliflərin fikrincə, bu yanaşma xüsusilə yuxu apnesi olan xəstələrdə hipertoniyanın müalicəsi üçün yeni üsulların əsasını qoya bilər.
