Olke.az saytından verilən məlumata əsasən, ain.az məlumatı açıqlayır.
Alimlər müəyyən ediblər ki, Şizofreniya xəstəliyindən əziyyət çəkən insanlarda yazılı nitq də ciddi şəkildə dəyişir. Ölkə.Az xəbər verir ki, araşdırmanın nəticələri "Journal of Writing Research" jurnalında dərc olunub.
Tədqiqat göstərib ki, halüsinasiyalar və sayıqlamalar kimi pozitiv simptomları üstün olan pasiyentlər daha uzun mətnlər yazır, lakin bu yazılarda təkrarlar, məntiq pozuntuları və süjetin təhrif olunması daha çox müşahidə edilir. Əksinə, apatiya və nitq aktivliyinin azalması ilə xarakterizə olunan neqativ simptomları üstün olan şəxslər daha qısa və yığcam yazır, lakin daha çox orfoqrafik və punktuasiya səhvlərinə yol verirlər.
Şizofreniya düşüncə, emosiyalar və davranışa təsir edən ağır psixi pozuntudur. Onun simptomları adətən iki qrupa bölünür: pozitiv və neqativ. Pozitiv simptomlara halüsinasiyalar və sayıqlamalar daxildir, neqativ simptomlar isə motivasiya itkisi, passivlik və nitq qabiliyyətinin zəifləməsi ilə müşayiət olunur.
Araşdırmada şizofreniya diaqnozu olan 41 yetkin şəxs iştirak edib. Onlara təxminən 530 sözlük qısa mətn oxudulduqdan sonra həmin hekayəni sərbəst şəkildə yazılı formada təqdim etmək tapşırılıb. Daha sonra yazılar struktur, məntiqi bağlılıq, leksika, qrammatika və səhvlər baxımından təhlil edilib.
Nəticələr göstərib ki, yazı üslubu simptomların növündən ciddi şəkildə asılıdır. Pozitiv simptomları üstün olan iştirakçılar daha çox fikir və söz ehtiva edən uzun mətnlər yazsalar da, bu mətnlərdə ardıcıllıq zəif olur və süjet bəzən təhrif edilir.
Neqativ simptomları üstün olanlar isə daha qısa və konkret yazılar təqdim ediblər. Bu yazılarda əsas süjet xətti daha yaxşı qorunsa da, yazı texnikasında – xüsusilə orfoqrafiya və punktuasiyada çətinliklər daha çox müşahidə olunub.
Ümumilikdə iştirakçıların əksəriyyəti hadisələrin xronologiyasını qoruyub və keçmiş zaman fellərindən düzgün istifadə edib. Bununla belə, bir çoxu əsas süjet xəttindən daha çox ikinci dərəcəli detalları yadda saxlayıb.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
