ain.az, Azpolitika.az portalına istinadən məlumatı açıqlayır.
“Kiyev paytaxt olanda, Moskva qurbağaların quruldadığı bataqlıq idi”
BMT Təhlükəsizlik Şurasının son iclasında Ukraynanın qurumdakı daimi nümayəndəsi Andrey Melnik Rusiyanın "ukraynalılar və rusların birliyi" haqqında rəvayətlərinə cavab olaraq kəskin çıxış edib.
“AzPolitika” xəbər verir ki, diplomatın çıxışı ciddi rezonans doğurub və müzakirələrə səbəb olub.
Diplomat xatırladıb ki, BMT Təhlükəsizlik Şurasının bundan əvvəlki iclasında Rusiyanın qurumdakı daimi nümayəndəsi Vasil Nebenzya "bir daha ukraynalılar və rusların guya tarixi birliyi haqqında tanış cəfəngiyatlara vaxt itirib".
"O, hətta biz ukraynalıların guya “30 gümüş pula satdığımız” Kiyev rus dövləti haqqında nəsə mızıldandı, icazə verin, tarixi faktları dəqiqləşdirim", - deyə Melnik bildirib.
Ukraynalı diplomat qeyd edib ki, 12-ci əsrin əvvəllərində Kiyev orta əsr Avropasının ən böyük və ən güclü dövlətlərindən birinin paytaxtı olub: "Müasir Moskvanın ərazisi isə o zaman qurbağaların quruldadığı bataqlıqdan başqa bir şey deyildi".
Melnik keçmişdə Moskva hökmdarlarının işğalçı, aqressiv hərəkətlərini xatırladıb. Qeyd edib ki, məhz Vladimir-Suzdal torpaqlarının knyazı Andrey Boqolyubskinin rəhbərliyi altında 1169-cu ildə Kiyev talan edildi və sakinlərinin çoxu öldürüldü.
"Moskva Kiyevə xəyanət etdi və bu günə qədər bu qəddar siyasəti davam etdirir: Kiyevi bombalamaq, Qızıl Qapımızı dağıtmaq, mülki şəxsləri zorlamaq və öldürmək", - deyə daimi nümayəndə vurğulayıb.
Rusiya nümayəndə heyətinə müraciət edərək o, ukraynalıların "xəyali birlik haqqında təhrif olunmuş tarixi dərslərə" ehtiyac duymadıqlarını deyib: "Kiyev 1000 ildən çoxdur ki, möhkəm dayanıb və daha 1000 il də dayanacaq. O, çiçəklənəcək, yenilməz qalacaq və Rusiya onu fəth edə bilməyəcək".
Melnik qeyd edib ki, özlərini dünyanın ikinci ordusu adlandıran Rusiya qoşunları son üç il yarım ərzində cəmi 9300 kvadrat kilometr ərazini ələ keçiriblər. O deyib ki, əgər onlar bu sürətlə irəliləməyə davam etsələr, bütün Ukraynanı ələ keçirmək üçün 183 il lazım olacaq.
"Putin Rusiyanın 12 ildən çox təcavüzdən sonra belə ələ keçirə bilmədiyi əraziləri Ukraynanın döyüşsüz təhvil verməsini tələb edir. Onlar sadəcə sülh danışıqlarını uzatmaq üçün ultimatumlardan istifadə edirlər", - deyə Melnik qeyd edib.
Daimi Nümayəndə həmçinin bildirib ki, Ukrayna qoşunları cəbhədə mövqelərini möhkəmləndirə biliblər və böyük əraziləri azad ediblər.
Sonda o, rus dilində şair Bulat Okucavanın şeirindən sitat gətirib: "Ziyafət bitdi, şamlar söndü... şinelini götür, gedək evə”. Odur ki, şinelinizi götürün və Ukraynadan rədd olun!”.
C.Məmmədli
“AzPolitika.info”
Ən son xəbərləri və yenilikləri almaq üçün ain.az saytını izləyin.
