Beyrutun şərqindəki Hazimiya rayonunda oteldə gizlənməyə çalışan İslam İnqilabı Keşikçiləri Korpusunun (SEPAH) dörd komandiri İsrail Hərbi Hava Qüvvələrinin dəqiq zərbəsi nəticəsində ləğv edilib.
İsrail mediasının məlumatına görə, komandirlər oteldə saxta adlarla 15 otaq sifariş etsələr də, yalnız bir otaqdan istifadə ediblər. Onlar həmçinin binadakı bütün videomüşahidə kameralarını söndürüblər. Görülən konspirasiya tədbirlərinə baxmayaraq, İsrail kəşfiyyatı onların dəqiq yerini müəyyən edib, bundan sonra həmin otağa raket zərbəsi endirilib. Hücum nəticəsində hər dörd komandir öldürülüb. Otelin digər qonaqları arasında xəsarət alan qeydə alınmayıb.
İsrail Müdafiə Ordusu zərbənin 24 martda Hazimiyadakı yaşayış binasına endirildiyini təsdiqləyib. Hədəf isə hərbçilərin məlumatına görə, "İran xüsusi xidmət orqanlarının rəhbərliyi altında terror layihələri hazırlayan" SEPAH üzvü Məhəmməd Əli Qurani olub. İsrail tərəfinin məlumatına görə, ləğv edilən komandirlər SEPAH-ın xarici əməliyyatlara cavabdeh olan "Qüds" qüvvələrinin tərkibinə daxil idilər.
