Portuqaliya millisi Kriştiano Ronaldosuz orta səviyyəli komandadır.
Ölkə.Az "Goal" jurnalına istinadən xəbər verir ki, bunu "Benfika"nın baş məşqçisi, portuqaliyalı mütəxəssis Jose Mourinyo deyib.
"Ronaldosuz Portuqaliya orta səviyyəli komanda kimi görünür. İnsanlar bizdən onu çağırmamağımızı xahiş edirlər. O oynamadı və nəticəni gördünüz. Rəqib üçün heç bir təhlükə, qorxu yoxdur. Bu, sadəcə Meksikanın təzyiqi altında olan bir komandadır", - deyə o bildirib.
Portuqaliyalı məşqçi həmçinin bildirib ki, Ronaldo meydanda olanda rəqiblər ehtiyatlı olurlar. "Onsuz onlar heç nə düşünmürlər", - deyə Mourinyo əlavə edib.
Ronaldo Portuqaliyanın Meksika ilə son yoldaşlıq oyununu buraxıb. Komanda 0-0 hesabı ilə heç-heçə edib.
Portuqaliyalı ulduz futbolçu, "Real Madrid"in keçmiş yarımmüdafiəçisi Luiş Fiqo isə bildirib ki, bu matç, həqiqətən də, Kriştiano Ronaldonun karyerasını bitirdikdən sonra Portuqaliyanın 1990-cı illərin səviyyəsinə qayıda biləcəyini açıq şəkildə göstərir: "Düzünü desəm, Ronaldo gəlib bizi dünyanın ən yaxşılarından birinə çevirənə qədər ölkəmiz o vaxtlar ən yaxşı futbol milləti hesab olunmurdu".
