Birləşmiş Ərəb Əmirlikləri (BƏƏ) Hörmüz boğazının blokadadan çıxarılmasında Birləşmiş Ştatlara hərbi yardım göstərməyə hazırlıq görür ki, bu da həmin ölkəni İrana qarşı hərbi əməliyyatlara birbaşa cəlb olunan ilk Fars körfəzi dövlətinə çevirəcək.
“İki sahil” xəbər verir ki, bu barədə "The Wall Street Journal" qəzeti yazıb.
Nəşrin məlumatına görə, Əbu-Dabi bu cür hərəkətlərə hüquqi əsas verəcək qətnamənin BMT Təhlükəsizlik Şurası tərəfindən qəbul edilməsinə çalışır. Bundan əlavə, BƏƏ-nin diplomatik nümayəndələri gəmilərin Hörmüz boğazından maneəsiz keçidini təmin etmək məqsədilə koalisiya yaratmaq təklifi ilə Avropa və Asiya dövlətlərinə müraciət edirlər.
Adı açıqlanmayan əmirlik rəsmisi bildirib ki, dövlət hazırda Əbu-Dabinin bu münaqişədə iştirakının formatını və konkret yollarını ətraflı şəkildə işləyib hazırlayır. Qəzet qeyd edib ki, Əmirliklərin bu qərarı ciddi risklərlə müşayiət olunur: İranla silahlı qarşıdurmaya cəlb olunma Yaxın Şərqdə hazırkı hərbi toqquşma başa çatdıqdan sonra belə yoxa çıxmayacaq uzunmüddətli gərginliyə səbəb ola bilər.
