Səudiyyə Ərəbistanından neft ixracı Hörmüz boğazındakı məhdudiyyətlər fonunda mart ayında təxminən iki dəfə azalıb. Bu barədə “Bloomberg” məlumat yayıb.
Tanker izləmə məlumatlarına görə, ay ərzində tədarükün həcmi gündə orta hesabla 3,33 milyon barel təşkil edib. Azalma İranın Fars körfəzindən tanker çıxışını faktiki olaraq məhdudlaşdırması ilə bağlıdır və bu, Ər-Riyadı neft axınlarını ölkənin qərb sahilləri vasitəsilə yönləndirməyə məcbur edib. “Bloomberg” qeyd edir ki, Səudiyyə Ərəbistanı ixracı Qırmızı dənizdəki terminallara yönləndirə bilməsəydi, azalma daha da ciddi olardı.
Martın 31-də “Reuters” xəbər verib ki, Hörmüz boğazının bağlanması fonunda OPEC ölkələri neft hasilatını 2020-ci ilin iyunundan bəri ən aşağı səviyyəyə endirib. Agentliyin məlumatına görə, mart ayında hasilat əvvəlki ayla müqayisədə gündə 7,3 milyon barel azalaraq 21,57 milyon barelə düşüb. “Reuters” qeyd edir ki, bu dövrdə yalnız iki ölkə — Venesuela və Norveç hasilatı artırıb.
Bundan əvvəl ekspertlər Hörmüz boğazı üzrə gəmiçiliyin daha da məhdudlaşdırılması halında neftin qiymətinin bir barel üçün 200 dollara qədər kəskin arta biləcəyini istisna etmirdilər. Bununla belə, bu ssenari əsas hesab olunmur.
