Neft qiymətləri kəskin artıb, çünki ABŞ Prezidenti Donald Trump yaxın 2–3 həftə ərzində İrana qarşı hərbi təzyiqin artırılacağını bildirib. Bu açıqlama münaqişənin tezliklə azalacağı ilə bağlı gözləntiləri zəiflədib və bazarlarda riskdən qaçma meylini gücləndirib.
Banker.az xəbər verir ki, may fyuçersləri WTI fyuçersləri 4.1% artaraq 104.21 dollar/barel olub. Beynəlxalq etalon Brent nefti isə iyun fyuçersləri üzrə 6% yüksələrək 108.02 dollar/barelə çatıb.
Tramp çıxışında bildirib ki, qiymət artımı “İran rejiminin kommersiya neft tankerlərinə və münaqişə ilə əlaqəsi olmayan qonşu ölkələrə hücumları” ilə bağlıdır. O, ABŞ-ın İrana qarşı “çox sərt zərbələr endirəcəyini” və müharibənin uzun çəkməyəcəyini qeyd edib, eyni zamanda Tehranla danışıqların davam etdiyini bildirib.
Tramp həmçinin deyib ki, “bizim Hörmüzə ehtiyacımız yoxdur, onun aqibəti boğazdan neft alan ölkələri düşündürsün.
“Fidelity International” şirkətinin portfel meneceri Corc Efstathopoulos CNBC-yə bildirib ki, bazarlar Trampın çıxışından ya münaqişədən çıxış siqnalı, ya da gərginliyin artacağı mesajını gözləyirdi. Onun sözlərinə görə, hazırkı siqnallar qeyri-müəyyənliyin davam edəcəyini göstərir.
Əsas risk faktorlarından biri də Hörmüz boğazı ətrafındakı vəziyyətdir. Dünyada neft və qaz daşımalarının təxminən beşdə biri bu marşrutdan keçir, lakin müharibə başlayandan sonra tanker hərəkəti demək olar ki, dayanıb.
İran isə Trampın atəşkəs istəyi ilə bağlı iddiasını təkzib edib və boğazın ABŞ rəhbərliyinin açıqlamaları əsasında açılmayacağını bildirib.
