Yaponiyada iş müsahibələrində namizədlərə verilən qeyri-adi bir sual illərdir maraq mövzusu olmağa davam edir: "Qan qrupunuz nədir?".
Milli.Az xəbər verir ki, Yaponiyadakı iş müsahibələrindən tutmuş Dr. Peter D'Adamonun "qan qrupu pəhrizi" nəzəriyyəsinə qədər, 0 qan qrupu sadəcə bioloji məlumat deyil, həm də bir xarakter və maddələr mübadiləsi xəritəsi kimi görülür. Olduqca aktiv immun sisteminə və dözümlü həzm quruluşuna malik olan bu qrupun üzvləri, müasir həyatın gətirdiyi bəzi risklərə qarşı digərlərindən daha "həssas" ola bilərlər.
0 qan qrupuna sahib fərdlər genetik olaraq mədədə bol miqdarda turşu istehsal etməyə meyllidirlər. Bu vəziyyət qidalanmanın əsasını təşkil edən ət məhsullarından əldə edilən zülalın maksimum səmərə ilə istifadə olunmasını təmin edir. Lakin yüksək turşu səviyyəsi bu qrupu digərlərinə nisbətən mədə xorasına daha meyilli edir. "American Journal of Clinical Nutrition" məlumatlarına görə, bu qrup kofein və alkoldan xüsusilə uzaq durmalıdır; çünki kofein onsuz da yüksək olan adrenalin səviyyəsini tətikləyərək sistemi yora bilər.
Yapon iş mədəniyyətində qan qrupunu soruşmaq sadəcə bir maraq deyil, bir şəxsiyyət analizi üsuludur. 0 qrupuna sahib şəxslər: məsuliyyətli, fədakar, nizamlı və vicdanlı praktik zəkalar kimi xarakterizə olunur. Stress altında olduqda isə bu "intizamlı" quruluş yerini qəzəb, hiperaktivlik və impulsivliyə (düşünmədən hərəkət etməyə) buraxa bilər.
Təbii tibb mütəxəssisi Dr. Peter D'Adamonun nəzəriyyələrinə görə, 0 qrupu fərdləri bəzi hormonal dalğalanmalara daha açıqdırlar. Aşağı qalxanabənzər vəzi hormonu səviyyələri və yod çatışmazlığı bu qrupda daha tez-tez görülür. Bu funksiya pozğunluqları fərdlərdə su toplanması (ödem) və idarə oluna bilməyən artıq çəki kimi metabolik nəticələr doğura bilər.
0 qrupu genetik olaraq daha yüksək adrenalin səviyyəsinə malik ola bilər. İdman əskikliyi və pis qidalanma birləşdikdə; insulin müqaviməti və qalxanabənzər vəzi aktivliyinin yavaşlaması kimi zərərli proseslər bu qrupda daha sürətli tətiklənir. Müasir həyatın gətirdiyi hərəkətsizlik 0 qrupunun ən böyük düşməni hesab olunur.
Xülasə: Qan qrupuna əsaslanan qidalanma nəzəriyyələri elm dünyasında hələ də müzakirə edilsə də, 0 qrupunun dözümlü həzm sistemi və stress altındakı biokimyəvi reaksiyaları fərdiləşdirilmiş sağlamlıq idarəetməsində mühüm məlumatlar təqdim etməyə davam edir.
Lalə Qüdrətova
Milli.Az
