Azərbaycanda ən yaşlı unuversitet müəllimi Məsumə Məlikovadır. Məsumə Məlikova Bakı Dövlət Universitetinin (BDU) Hüquq fakültəsinin Dövlət və hüquq nəzəriyyəsi və tarixi kafedrasının müdiridir.BUTA.TV Mətbuat.az-a istinadla xəbər verir ki, görkəmli alimin bütün fəaliyyəti BDU ilə bağlıdır. O, 68 ildi doğma təhsil ocağında çalışır. Qeyd edək ki, hüquq elmləri doktoru, professor Məsumə Məlikova 22 noyabr 1929-cu ildə Bakı şəhərində dünyaya göz açıb. 1952-ci ildə BDU-nun Hüquq fakültəsini fərqlənmə diplomu ilə bitirib. Ali təhsilini başa vuran M.Məlikova elə o vaxtdan BDU-nun Hüquq fakültəsinin Dövlət hüququ kafedrasında müəllim vəzifəsində saxlanılıb. 1953-cü ildə BDU-nun aspiranturasına qəbul olunan Məsumə Məlikova elmi işini davam etdirmək üçün 1954-cü ildə M.V.Lomonosov adına Moskva Dövlət Universitetinin (MDU) aspiranturasına ezam edilib. Aspiranturanı bitirdikdən sonra 1958-ci ildə MDU-da "M.F.Axundovun ictimai-siyasi baxışları" mövzusunda namizədlik, 1973-cü ildə isə "XIX əsrin II yarısı-XX əsrin başlanğıcında Azərbaycan maarifçilərinin siyasi və hüquqi baxışları" mövzusunda doktorluq dissertasiyalarını müdafiə edib. Məsumə Məlikova 1958-1968-ci illərdə Hüquq fakültəsinin Dövlət hüququ kafedrasının müəllimi olub. Sonra Dövlət və hüquq nəzəriyyəsi və tarixi kafedrası təşkil edilib. O, 1968-ci ildən indiyə kimi bu kafedraya rəhbərlik edir. M.Məlikova 1974-cü ildə professor elmi adını alıb, 1989-cu ildə isə AMEA-nın müxbir üzvü seçilib. Alim "Azərbaycan Respublikasının Əməkdar hüquqşünası" fəxri adı, "Şərəf nişanı" və "Şöhrət" ordenləri, "Azərbaycan Respublikası Prezidentinin fəxri diplomu", "Heydər Əliyevin 100 illiyi (1923-2023)" yubiley medalı, "Bakı Dövlət Universitetinin 100 illiyi (1919-2019)" yubiley medalı və çox sayda fəxri fərmanlarla təltif olunub. İki il əvvəl Məsumə Məlikovanın 95 illik yubileyi təntənəli şəkildə qeyd olunub. 2029-cu ildə Məsumə xanımın 100 yaşı tamam olacaq. O, yaşının çoxluğuna baxmayaraq, bu gün də təcrübəsini gənc alimlərlə bölüşür.
