Hörmüz boğazından son 24 saat ərzində 15 gəmi keçib. Bu barədə İranın “Fars” agentliyi məlumat yayıb. Nəşrin məlumatına görə, hazırkı trafik hələ də əhəmiyyətli dərəcədə aşağı səviyyədə qalır — daşımaların həcmi ABŞ və İsrailin İrana qarşı hərbi əməliyyatına başlamazdan əvvəlki göstəricilərdən təxminən 90% azdır.
Aprelin 5-də ABŞ prezidenti Donald Tramp boğazın açılması üçün son tarix olaraq aprelin 7-si, Şərq vaxtı ilə saat 20:00-a qədər (8 aprel, Bakı vaxtı ilə saat 04:00) müddət müəyyən edib. Bundan əvvəl o, sərt formada İrandan marşrutu açmağı tələb etmiş və yeni zərbələrlə — stansiyalar və körpülərə hücumlarla hədələyib. Tehranda isə bu cür bəyanatların ABŞ-ın “hərbi cinayətə” hazır olduğunu göstərdiyi bildirilib.
Bu fonda aprelin 6-da “Axios” mənbələrə istinadən ABŞ, İran və vasitəçilər arasında mümkün 45 günlük atəşkəslə bağlı danışıqlar aparıldığını xəbər verib. Bildirilir ki, bu razılaşma sonradan hərbi əməliyyatların tam dayandırılmasına keçə bilər. Mənbələrin qiymətləndirməsinə görə, yaxın 48 saat ərzində razılaşmanın əldə olunması ehtimalı aşağı olaraq qalır. Bununla belə, nəşrin məlumatına əsasən, hazırkı danışıqlar münaqişənin daha da eskalasiyasının, eləcə də regionda mülki infrastruktur və enerji obyektlərinə zərbələrin qarşısını almaq üçün son imkan kimi qiymətləndirilir.
