Bakı, 6 aprel, AZƏRTAC
Əbu-Dabi Kök Hüceyrə Mərkəzi (ADSCC) regenerativ tibdə əhəmiyyətli bir nailiyyət əldə olunduğunu elan edib Xəstənin öz hüceyrələrindən beyin kök hüceyrələri istehsal etmək üçün metod hazırlanıb. Bu, BƏƏ paytaxtını Yaxın Şərqdə nevroloji xəstəliklərin müalicəsi üzərində işləyən aparıcı qlobal qurumlar sırasına qoşulan ilk şəhərə çevirir.
AZƏRTAC-ın WAM agentliyinə istinadla xəbər verir ki, proses kiçik bir dəri və ya qan nümunəsi toplamağı, hüceyrələri pluripotent vəziyyətdə yenidən proqramlaşdırmağı və sonra onları neyronlara çevirməyi əhatə edir. Bu hüceyrələr zədələnmiş toxumaları bərpa etməyə, Parkinson, Alzheimer, ALS və onurğa beyni zədələrinin müalicəsi üçün yeni yollar açmağa qadirdir. Milan-Bikokk Universitetinin professoru və ADSCC-nin baş tədqiqatçısı Angelo L. Veskovi texnologiyanı regenerativ tibbin ən perspektivli sahələrindən biri adlandırıb. Tədqiqatçılar Fabio Miravina və Lorenzo De Rosa virussuz yenidən proqramlaşdırma metodlarının vacibliyini və klinik istifadə üçün istehsalın genişləndirilməsinin zəruriliyini vurğulayıblar.
Tədqiqatçı Fabio Miravina qeyd edib ki, virussuz yenidən proqramlaşdırma metodları mikrobioloji təhlükəsizlik və klinik tətbiq üçün çox vacibdir. Tədqiqatçı Lorenzo De Rozanın sözlərinə görə, növbəti addım istehsalın miqyasını artırmaq, protokolları standartlaşdırmaq və tənzimləyici təsdiq üçün hazırlıqdır.
Bu nailiyyət BƏƏ-nin regenerativ tibdə artan rolunu əks etdirir. Elmə strateji investisiyalar vasitəsilə Əbu-Dabi regionda və dünyada xəstələrin həyatını yaxşılaşdıra biləcək inqilabi müalicə üsulları yaratmağa çalışır.
