Xəzər Rayon Məhkəməsində qəsdən sağlamlığa yüngül zərər vurmada təqsirləndirilən Vüsal Kərəmovun (adı, soyadı şərtidir) cinayət işi üzrə məhkəmə istintaqı başa çatıb.
Pravda.az-ın əldə etdiyi məlumata görə, sonuncu keçirilən prosesdə hökm oxunub.
Məhkəmənin hökmü ilə o, cinayət məsuliyyətindən azad edilib, barəsində olan böyük ictimai təhlükə törətməyən aşkar cinayətlər üzrə məhkəməyədək sadələşdirilmiş icraata xitam verilib.
İş materiallarına əsasən, hadisə 22 fevral 2026-cı il tarixdə saat 23:45 radələrində təqsirləndirilən şəxsin paytaxtın Yasamal rayonunda yerləşən yaşadığı ünvanda baş verib. Belə ki, ailə münaqişəsi zəminində yaranmış mübahisə zamanı Vüsal Kərəmov qardaşının arvadı, zərərçəkmiş İradə Kərimovaya qarşı fiziki zor tətbiq edib.
Araşdırmalarla müəyyən edilib ki, təqsirləndirilən şəxs zərərçəkmiş şəxsin baş nahiyəsinə bir dəfə, burun nahiyəsinə isə iki dəfə yumruq zərbəsi endirib. Nəticədə qadına alının, sol gözaltı nahiyənin qançırları, sol göz almasının ağlı qişasına qansızma, eləcə də burun nahiyəsində sıyrıq kimi xəsarətlər yetirilib.
Məhkəmə-tibbi ekspertizasının rəyinə əsasən, qeyd olunan xəsarətlər sağlamlığın qısa müddətə pozulmasına səbəb olan yüngül dərəcəli bədən xəsarətləri kimi qiymətləndirilib.
Məhkəmə iclasında Vüsal Kərəmov ərizə ilə müraciət edərək ona qarşı irəli sürülmüş ittiham üzrə özünü təqsirli bildiyini qeyd edib. O, törətdiyi əməldən peşman olduğunu və zərərçəkmiş şəxslə barışdığını deyib.
Təqsirləndirilən şəxs məhkəmədən barəsində olan sadələşdirilmiş icraat materialına bəraətverici əsaslar olmadan xitam verilməsini xahiş edib.
Məhkəmə iclasında İradə Kərimova da ərizə ilə müraciət edərək təqsirləndirilən şəxs ilə barışdığını, ona qarşı heç bir şikayət və tələbinin olmadığını bildirib.
Kamal Məmmədov
