Loristan əyalətində partlamamış vəziyyətdə tapılan yüksək texnologiyalı sursat zərərsizləşdirilib…
Poliqon xəbər verir ki, İranın Tasnim Agentliyinin məlumatına görə, İranın Loristan əyalətində ABŞ istehsalı olan GBU-39 SDB tipli idarəolunan bomba partlamamış vəziyyətdə ölkənin silahlı qüvvələrinin əlinə keçib. Bildirilir ki, sursat zədələnmədən tapılıb və bu, onun texnoloji xüsusiyyətlərinin öyrənilməsi baxımından xüsusi əhəmiyyət daşıyır.
Məlumata əsasən, sözügedən bomba yüksək dağıdıcı gücə malik olmaqla yanaşı, yüngül döyüş başlığı, inkişaf etmiş naviqasiya sistemləri, GPS maneələrinə qarşı davamlılıq və kompozit korpus kimi xüsusiyyətlərlə təchiz olunub. Bu cür sursatlar adətən yüksək dəqiqlikli zərbələr üçün istifadə olunur.
İranın İslam İnqilabı Keşikçiləri Korpusu bölmələri tərəfindən Loristanda xüsusi əməliyyat nəticəsində bomba zərərsizləşdirilib. İran tərəfi bildirir ki, sursatın salamat vəziyyətdə əldə edilməsi ABŞ-nin hərbi texnologiyalarının öyrənilməsi üçün mühüm imkan yaradır.
Ekspertlər qeyd edir ki, bu cür hadisələr hərbi texnologiyaların yayılması və qarşı tərəf tərəfindən analiz edilməsi risklərini artırır. ABŞ-nin isə bu tip silahların üçüncü tərəflərin əlinə keçməsindən narahat olduğu bildirilir, çünki bu, onların taktiki üstünlüklərinə təsir göstərə bilər.
Hadisə regionda davam edən hərbi qarşıdurma fonunda baş verib və tərəflər arasında texnoloji üstünlük uğrunda rəqabətin daha da gücləndiyini göstərir.
Poliqon.info
